ninanesto
ninanesto
vakantio.de/ninanesto

Santos / Paranapiacaba

Veröffentlicht: 19.10.2017

Santos

Acho in Santos sind mir mit em Taxi ih euses Apartment gfahre. Mir sind imne guete Vierteli glandet. Euses Apartment isch ime grosse Hochhus gsi, es het 7 vo dene Hochhüser gha und ide Mitti en riese Pool. 

Am erste Tag hetz nur gregnet. Aber es isch gad guet gsi, mir sind nämlich zimlich uf de Felge gsi nach Iguaçu. Mir hend Zit gha zum d Wösch mache, ali Föteli uf de Laptop lade, eusi Filmli aluege vo de GoPro. Am Abig hend mir den welle go esse, wit laufe het eus aber agschsisse. Mir hend direkt uf de andere Strossesite en Imbissstand entdeckt. Wo mir den zimlich rotlos det gstande sind, isch eh Brasilianerin ufgstande und het gfroget ob sie dörf übersetzte. Mir hend gad gmerkt d Chemie passt. Mir sind den zu ihne ane ghocket und das Päärli het super Englisch chöne. Nach ca. 2 h rede hend sie gseit das sie Hei müend. Mir hend jedoch d Handynummere ustuschet und hend eus den am Mittwuch zum z Nacht verabredet. 

Am Tag druf ischs biz besser Wetter gsi und mir sind d Stadt go aluege und underanderem hend mir de 100th Alauf gno, zum de Muriel ENDLICH eh Regejacke z poste. Es isch es richtigs schös brasilianisches Städtli, ca so gross wie Winterthur. 
Und jo, unglaublicherwis hend mir den sogar eh Regejacke fürd Muriel gfunde. 

Paranapiacaba


Am Mittwuch hend mir den welle es Werk go bsueche, wo min Arbeitgeber, de Stadler die gröscht Zahnradlocki vo de Welt usgliferet het, die heisst MRS logistica. Sie düend Güeterwäge de Berg ab und de Berg uf fahre. Jo leck, da isch mol en typische Ernesto/Müri-Chaos Tag gsi. Mini Kontaktperson us em Werk, de Marcio het mir am Zistig Obig gschribe, das eus de Fabio (en Arbeitskolleg) uf die halbi 10ni am Morge wird abhole. Mir sind wie veribart dusse gstande und hend uf de Fabio gwartet. Langsam ungeduldig am 10 vor 10ni fahrt es Auto ane, de Typ dine het frogend um sich glueget. Ich renne ane und frog "Bisch du de Fabio"? Er het den gseit "Jo chönd istige"! Nichts ahnend stiget mir ih und fahret richtig Strand. Mir hends chli komisch gfunde das er keis Wort mit eus gredet het und immer nur gfroget het ob mir wend go Schwimme. Er het nur Portugischisch chöne und es biz Spanisch. Nach ca 15 min bin ich den misstrauisch worde und frog en uf Spanisch "Gell du schaffsch mit em Marcio"? Er luegt mich nur komisch ah und schüttlet stirnrumpflend de Kopf. "Du schaffsch doch bi de MRS Logisics"? Wieder verneinet er. Ich frog en nomol "Bisch du de Fabio"? Er lachet und seit "Jo de Fabio vo Uber"! (En Taxidienst in Santos wo mit Privatautos Lüt umefahret. Mir hends gschafft, tatsächlich bim falsche Fabio ihzstige wo zur gliche Zit am gliche Ort uf Lüt gwartet het. Da mir kei Internet gha hend, hend mir au niemetem chöne schribe. De Uber Fabio het den am Marcio aglüte, de het den am MRS Fabio aglüte und so hend mir eus den nach ca 40 min Auto fahre chöne treffe. Wo de MRS Fabio ane gfahre isch seit er als ersts "Ihr müend langi Hose alegge"! Wieder zruck is Apartment. Am 12i sind mir den ENDLICH mit em MRS Fabio richtig Depot gfahre. Mir hend ihm die Story verzellt und er het sich kaputt glachet. Mir mittlerwile au. Nach ca. 45 min Autobahn sind mir no 20 min dur Schotterströssli und Dschungel im Depot acho. 
Mir sind überrascht gsi wie gross sie Sicherheit schribet. Sie hend eus komplett ihkleidet, sogar niegelnagelneui Stahlkappe Schue übercho.
Jo ich weiss, ich lueg blöd dri. Wieso ich so komischi Riterstiffel a han? Ich ha den lachend gfroget "Isch das weg de Schlange"? Und sie hend den relativ ernst gantwortet "Jo, das sie dir nid in Chnöchel bisset wend dusse uf em Gleis ume laufsch"! Mir hend ca 1 h müese warte bis mir hend chöne ufs Gleis. Jede wo a eus verbi gloffe isch het aghalte und paar Wort mit eus gwechslet. Mir hend fast e Stund lang glachet. Richtig cooli Lüt.
Do het eus d Locki abgholt uf em
Gleis. Mir hend chöne ihstige und den ischs au los gange. Mir hend müese uf de Berg ue fahre zum Güeterwäge hole. 
Noch ca 30 min Fahrt sind mir dobe acho und hend die Wäge aghenkt. Es isch wie chli es Geisterstädtli gsi, biz unheimlich. 
Dune acho het den scho de Shuttle Bus gwartet wo eus uf Santos brocht het. Mir hend üs verabschidet, die offiziell Schoggi-Übergob gmacht und sind den wieder richtig Santos. Es mega Erlebniss gsi. 
Am Abig hend mir den no mit eusne neue Amigos abgmacht wie vorher erwähnt. Mir sind Japanisch go esse und es isch mega fein gsi. Mir hend eh gueti Zit gha und neue Fründe gwunne. 
Hüt isch bereits de letzti Tag, mir sind de Tag dur no biz an Strand go relaxe. Am Abig gönd mir no e letstmol an Burgerstand und verabschidet eus vo de Lüt. Noher gohts via Nachtbus uf Itajaí. Det bsuechemer de 7th best Freizitpark vo de Welt!

Bis Bald 

Ernesto&Muriel

Next Stop: Itajaí 

Antworten

Brasilien
Reiseberichte Brasilien
#brasilien#santos#paranapiacaba