ninanesto
ninanesto
vakantio.de/ninanesto

foz do iguaçu

Veröffentlicht: 15.10.2017

Foc Iguaçu

In Sao Paulo sind mir acho mit em Car. D Sara het es Hotel reserviert, mitte im Zentrum. Mir sind ih strömendem une ue seichendem Rege richtig Hotel gfahre, es het immer schlimmer usgseh, Obdachlosi, Graffitis ect. S Taxi het aghalte und er het gseit "mir sind do"! Mir lueget une ue und gsend en richtig hessliche Block. Na guet, mir hend ihchecket innere Geister-Lobby, so leer. Im Zimmer acho sind d Schueh fast klebe blibe. Im Bett hesch a de verschidene Hoor a chöne zelle, de wievielti Gast du ez bisch. Mit hungrigem Buch sind mir ufd Suechi nach eme Restaurant gange, d Lüt uf de Stross hend eus ali mega ahgstarrt. Mir hend es Restaurant gfunde und gesse, sogar guet. Noher hend mir mit ere Kollegin vo de Sara abgmacht wo in Sao Paulo wohnt, sie isch fassigslos gsi "Was? Wieso hend ihr eh Hotel im Nutte-Crack Viertel? Gönd uf kein Fall z Fuess irgendwo ane"! Ohjeee.. Via Taxi sind mir den direkt id Lobby ie gfahre und hend die Nacht irgendwie ume brocht. Am nächste Tag ischs jo richtig Foz Iguaçu gange.

Vo Sao Paulo us sind mir am Fritig am 19:00 in Car igstige. Bim iegoh isch schnell en ganz komische Gruch id Nase gstige. Es het noch Urin gstunke, vo hine bis füre. Und au sus ischs en alte Chlapf gsi. SUPER, jetzt 15 Stund eso fahre! Mir sind vom erste Car so mega begeisteret gsi, sodass mir ez chli entüscht gsi sind. Mit hend eus jedoch de Name vo de Gsellschaft ufgschribe und werdet dete bestimmt nüme bueche.

Foz Iguaçu, falls da nid für ali en Begriff isch, das sind die gröschte Wasserfäll vo de Welt zmitzt im Amazonas. Im drü Länder-Eck: Brasilie-Argentinie-Paraguay. Es het 20 Grossi Wasserfäll und 255 chlini Wasserfäll. Und zum schnell d Dimensione klar zmache, euse gross Rhyfall wer grad so knapp is Rangking vo de 255 chline Wasserfäll ie cho.

Freitag der 13te. In Foz Iguaçu acho hend mit es Taxi gno zu eusem Hostel. Das wer zumindenst de Plan gsi. De Taxifahrer het sich weniger uskennt wie mir. Und ihr chönd mir glaube, ich bi no nie in Iguaçu gsi. Irgendwen hends mir den glich gfunde. De Hostel Bsitzer het eus empfange und het eus zuglich rotlos aglueget und gfroget "hend ihr reserviert"? Natürlich het er kei Reservation vo eus gha, was nid witerhin schlimm gsi isch wie sich bim witere Gspröch usegstellt het. Er het vom Martin Luther King verzellt und das sich also ganz und gar nid ghört das Buebe und Meitli im gliche Schlofsaal pfüselet. Ohje, nichts wie weg hier haha. Mir hend spontan es Hotel buechet, was mega schön gsi isch. Mir hend die bescht Duschi sit dehai chöne gnüsse, es isch suber gsi und het e gueti Lag gha. Noch em Zimmer bezieh hend mir eusi Daypacker parat gmacht, sind uf de Bus grennt und sind für 85 Rappe ca 45 min lang zu de Wasserfäll uf brasilianischer Site gfahre. Det acho hend mir es Billet glöst für 14 CHF und en Shuttle Bus het eus richtig Wasserfall brocht. Usgstige hend mir scho ghört was uf eus zuechunt. Es het ein grosse, betonierte, breite Trail gha wot hesch chöne laufe. Mir sind paar Schritt gloffe und den han ich müese vor stune stoh blibe. En gigantische Ahblick, Wasser sowit wied luege chasch. Mir sind de Trail abgloffe und hend alles chli vo witem gseh, zum Teil hesch chöne uf de Steg use laufe.


Tag 2;

Bienvenida a Argentinia - Cataratas del Iguazú. Mir hend im Hotel en direkt Shuttle uf Argentinie buechet, zum die Site au no z gseh. Da mir ih vielne Bloggs glese hend das die argentinisch Site schöner seg. Am Morge sind mir am 6:00 ufgstande, z Morge gesse und ab richtg Argentinie. Dete acho sind mir inen riesige Nationalpark gfahre. Mir hend Billet glöst und sind ines herzigs, noch Diesel stinkends Zügli ghocket wo eus ah verschideni Stärt vo de Trails gfahre het. Nei, es isch kein Stadler-Zug gsi. 

Da mir "nur" vom 8:30-12:00 Zit gha hend, hend mir eus müese Prioritäte setzte, da es unmöglich gsi wer zum de ganz Trail ablaufe. In Brasilie het mers in 4 h gschafft. Do wers unmöglich. Zudem het mer viel meh Möglichkeite gha zum frei ume laufe, jensti Wäg hesch chöne neh. Uf dem Bild gsender d Trail vo Brasilie (uf de linke site) und d Trails vo Argentinie (rechte site)

Uf so coole Stegli bisch dur de Amazonas gloffe richtig Wasserfäll.

Wo mir zum erste Ussichtspunkt cho sind hend mir gmerkt, das mir quasi uf em Wasserfall laufet. Du bisch so nöch am Wasser gsi, unglaublich. 

Mir hend den guet 3/4 vo de Trails fertig gmacht bevor mir wieder retour richtig Hotel gfahre sind. Und jo, es het sich glohnt. Es isch nomol öbbis ganz anders gsi wie die brasilianischi Site. Mer hend viel meh Tier gsi u.a Tucan, Ameisebäre, verschideni Vögel, Leguane und Affe. Anschinend hets au Pumas und Leoparde gha, isch mir aber glich gsi sind die eus nid über de Weg gloffe. Will d Muriel immer gseit het wen sie so eine gseht will sie Büsi streichle und Büsi mitneh. Ich ha aber kei Lust zum so eine die ganz Reis mitschläppe, aso besser so.

Jetzt sind mir in Santos ime super schöne Apartment acho. D Heifahrt het anstatt 16 h halt 20 h duret, solang ischs eim jedoch nid vorcho. Ah jo, de Car het zwor chli gmüffelet aber zum Glück nüme noch Urin. Jo, mir gänd eus langsam mit chline Sache z Friede.

Macheds guet und en guete Wuchestart

Müri&Ernesto


Nächster Halt: Itajaí

Antworten (1)

Reto
Wie immer spannend gschriebe und super Fotis, wiiter so

Brasilien
Reiseberichte Brasilien