08.09. - 24.09.23 - Irgendwo im Güggehüü 1.0

Am 08.09. beni denne elei wiiter, met em Bus bes uf Williams Lake, wo mich denn min Host, d Chris, abgholt het. Vo det us sends denn nomol 3 Stund fahrt gsi, richtig nordoste is nüt use. Vo de nöchste Stadt (met 100 Ihwohner) isch ehre Wohnort öppe en Stund entfärnt.

Sie isch en Guide und nimmt Lüt met ih ihrem Gebiet zum ufd jagdt goh und Geisse, Bäre oder Moose (oder alles andere was läbt) go schüsse. I dere ziit wo ich det gsi ben händ sie 2 Bäre heibrocht...

Näbedra het sie no es paar Kabine wo vermietet wärde a Lüt ("Crewguys") vo logging companies, well die do usse de Wald düend rode zum Holz zgünne.

Chum ben ich det acho, han ich im prinzip s ganze business übernoh: Sie und die andere zwei agstellte döt send alli ufd Jagdt gange, dass heisst ich han döt müese för die Crewguys choche, d Hünd füetere und luege dass suscht alles lauft. Da esch scho es rächt grosses Vertraue wo sie mer do entgegebrocht händ, mech nach eim Tag ihfüehrig eifach grad elei z loh. Und sicher au öppis, wo ich i min Läbenslauf cha ufneh "kann mit grossem Druck und Verantwortung umgehen" oder so 😵‍💫

Vo Mentig bes Donnstig beni also de ganz Tag beschäftigt gsi met choche, abwäsche und dogwalks, wod Crewguys aber am Donnstig heich gange sind hani uf einisch nömm vell z tue gha und vorallem beni ganz elei (!!) irgendwo im nirgendwo ghocket. Vorallem lustig werds, wenn de ganz Strom ufem Grundstück vomene Stromgenerator bezoge wird, wo mer im normalfall zweimal am Tag för 1 Stund aloht & s Wlan natürli au über de Strom lauft (heisst, hettis ergend en unfall gäh, hetti zersch de Generator müese agloh wärde, dass s Internet lauft, bes mer 911 hetti chöne alüte, well Netz hesch au ersch i 300 Kilometer weder).

Wenn mer i de letzte paar Wuche praktisch nie elei gsi isch und chum en ruhigi Sekunde gha het, hitteds ebe grad nomol chli andersch, uf einisch ganz elei im kanadische Outback, abgschnitte vo allne andere z sii.

Am Samstigobe send denn die erste vo de Jagdt zruggcho (ohni öppis gschosse zha). Au d Wuche druf isch zum Glöck nömm so einsam gsi, well ufs mol hani doppelt so vell Lüt zum bechoche gha als i de vorherige Wuche, Plus hani no unterstützig vo de Lia becho, sie isch au als Ushilf det agstellt. S zweite i de Chuchi z wärchle het grad vell meh Spass gmacht.

Zwüschedure hets no einisch gschneit gha und es paar Waserleitige send igfrore - normali Sache i de Rocky Mountains mitti Septämber.

Am 24. Septämber han ich denn vo Jäger us de USA wo richtig Heimat abgreist sind en mitfahrglägeheit uf Big Lake becho, wo ich denne vo mim nöchste Host abgholt worde ben.

🌻

Facts of the days:

• E Simcharte met Date ha bringt ned so vell wennd im kanadische Nüt ohni Netz bisch
• De Nachthimmel isch sooo schön!!
• Vo 120% uf 15% aktivität abezgoh und denn no ganz elei z si isch ned sehr empfählenswärt (möcheds eifach ned)
• Wemmer Hünd debii het mues mer kei angst vor bäre ha
• Händer schomol Öpfel in Cups abgmässe? Ich jetzt scho (die Masseinheit just makes sense 🤌🏻)