16.01. - 17.01.2024 - Krabi

16.01.2024

Nach chli stress zum rächtziitig zu de Busstation z cho, send mer denn vo Bangkok us uf Surat Thani gfahre worde. Vo det us isch eusi Reis aber no wiiter gange, nomol übers ganze Land uf die anderi Siite, z Ziel vo dem Tag isch nämlich Krabi gsi. Vell ussert Bus und Taxi gfahre hend mer a dem Tag ned gmacht. 

17.01.2024

Mer send zum Wat Tham Suea gfahre, det send mer zerst in Tigertempel und hend nachene 1260 Stägetritt in Agriff gnoh. Det send mer scho chli a eusi Gränze cho, d Stägetritt send unregelmässig gsi, es isch heiss und es het e höchi Luftfüechtigkeit gha (& ein Aff det het met mer welle schlegle 🤨) . Met Pause und vell Wasser trinke hend mers denn ufe gschafft und send met ere schöne Ussicht und enere riesige goldige Buddhastatue belohnt worde. 

Wo mer weder dunde gsi send, send no 2 Elefante verbii gloffe - leider send sie aber gar ned guet behandlet worde vo dene Lüt det... 

Am "night market" hets für eus denn no öppis z ässe geh (und s Tom Kha Gai isch leider ned so fein gsi wie das wo de Papi immer macht 🥲).