05.01. - 07.01.2024 - Los Angeles

05.01.2024

Churz nach Mitternacht het euse Flug vo San Juan uf Atlanta boarded, det hend mer denn zmitzt i de Nacht & im Halbschlof s Gepäck go abhole und neu go ufgeh, nomol durd Security und dur da zweimal dur de ganz Flughafe eiere. Am 7ni isch denn euse nöchst Flug uf LA abgfloge.

Z Los Angeles hets am Flughafe denn erst mol en Verschnuf & Kafipause geh und es "boah mer send scho mega lang unterwägs, s isch aber trotzdem erst morge" durd ziitverschiebig.

En Uber het eus denn zu eusem Hostel gfahre, vo det us send mer nachem Gepäckablade und churz früsch mache au scho grad wiiter uf Santa Monica. 

Det hend mer erstmol en sehr feine Burrito zum zmittag gässe und durd Stadt gloffe, hend en Begegnig met ere Verchäuferin gmacht wo eusi Stärnzeiche uf de erst Versuech richtig grote het (?) und eus denn Räucherstäbli gschänkt het und uf de Sunneuntergang send mer ufs Pacific Pier & hend de Pazifik aglängt (hämmer das uf dere Reis au no erledigt 🫱🏻‍🫲🏻) . S isch doch grad rächt früsch gsi wenn mer direkt vonere Insle us de Karibik chunnt.

Am achti send mer denn wie totgschlage im Bett gläge, well s letzt mol gschlofe hani vor 40 Stund.

06.01.2024

Nach 11½ Stund schlof beni denn weder richtig ready gsi und mer hend de Tag gnutzt, zum Hollywood unterd Lupe z neh. Gstartet hemmer bem Walk of Fame, wo mer paar Strosse ufe und abe gloffe sind und es paar bekannti Näme entdeckt händ.

Zum zmittag hend mer denn för amerikanischi Verhältnis rächt guets Brot gfunde. En Kafi hets nachene au no geh und spontan händ mer entschide, no de neu Film Wonka im Kino go luege, wenn mer scho no amne englischsprochige Ort sind. 

Zwüsche denn, wo mer beschlosse hend, dass mer de Film wend go luege und wo mer schlussendlich im Kinosaal ghockt sind isch nur ein Stund vergange, aber das isch ungloge die wildsti Stund vom ganze Tag gsi. Churz zämegfasst; mer hend die dreihendi Plattform vo TikTok gfunde, d Erin isch fast vonere Schlange agriffe worde und churz danach het eus de Killerclown vo "It" eus en Arm agschmisse. Zwüschedure hend mer no d Handabdrück vo de Avengers gfunde und Fötteli vom Hollywoodsign gmacht.

Im Kinosaal hend mer denn usegfunde, dass mer de Film in 4D lueged (und er isch sehr sehr toll gsi).

Nachem Film ischs denn scho dunkel gsi dusse und mer send zum Griffith Observatorium ufegfahre. Leider isch de Himmel zu bewölkt gsi und sie händs Teleskop ned agha, aber mer hend trotzem en gueti Ussicht über die ganz Stadt gha.

07.01.2024

Ufbroche send mer zum Venice Beach, wo mer am Strand euses Picknick vor de Möve verteidigt hend. Det send mer no chli umegloffe und händ d Skater bewunderet und hend en mega Sunneuntergang beobachtet. 

Denn send mer no is Viertel vo de Stars, d Beverly Hills. S het mega vell türi Autos met verspiegleter Schiibe gha, wer isch ächt alles a eus verbiigfahre wo me kännt? Zu dem Ziitpunkt send nämlich grad au d Golden Globes gsi, mer hend probiert chli nöcher a das Gebäude z cho, aber leider ischs (natürlich) sehr guet bewacht gsi. Aber mer send sehr sehr nöch a Stars wie Taylor Swift, Timothée Chalamet, Billie Eilish oder em Barbie-cast gsi!

🌻

Facts of the days:

• Mer send es zweits mal übers Bermudadrüeck cho ohni z verschwinde
• S het enormi Palme in Kalifornie
• Für wa sett mer Droge neh wenn mer nach 40 Stund ohni Schlof die glich würkig het?
• Oompa Loompa doompety-doo, I've got a tragic tale for you