13.01. - 15.01.2024 - Bangkok

13.01.2024

De Flug uf Bangkok isch sehr chillig gsi, wells Flugzüg so leer gsi isch het jedi vo eus ine seperati Reihe chönne ligge und so es bitz agnähmer schlofe. Leider hets eus sehr fest duregschüttlet und s isch rächt oft d Durchsag cho, dass mer sich wäg de Turbulenze weder sett aschnalle. Geg die 3 am Morge send mer glandet, hend euses Gepäck chöne abhole und hend bes öppe am 8i d Ziit no be de Gepäckbänder verbrocht, bevor mer eus denn am Flughafe no öppis Zmorge gsuecht händ.

S het en rächti Krisesitzig geh a dem Flughafe, mer hend nomol alli eusi Thailandplän über de Huufe grüert und entschide anstatt in Norde z Reise, doch zerst lieber de Süde go aluege. Det isch denn au klar worde, dass de nöchsti Flug us Thailand min Heiflug wird.

Es Taxi het eus denn zu eusem Hostel brocht (und mer hend weder en Hitzeschock becho well mer weder us de Chälti vo LA und Japan cho send). Eusi Suechi nach Ässe und eme vertrauenswürdige Bankomat het sich als rächts Abendtüür usegstellt, vorallem well es paar Chreisläuf grad nömm so mitgmacht hend. 

Schlussendlich hend mer denn aber amn Streetfoodstand öppis feins becho und zum Dessert früschi Wassermelone und Ananas gässe.

14.01.2024

S het Pancaces met de beste Mango woni jeh gässe ha zum Zmorge geh. Denn send mer uf, de Chinatown und d Umgäbig in Bangkok go erkunde. Det hend mer au en sehr en coole Lade gfunde, wo sehr toli Ufneihbatches verchauft het, det send mer denn es ziitli stecke blibe und hend paar Souvenirs mitgnoh. Unterwegs hend mer au no Bananemilch im Tetrasack gfunde (? wie trinkt mer da richtig? Äuä sicher ned so wie ichs gmacht ha). 

Wiiter sind mer no zumne Ichaufszentrum, wo mer endlich Kontaktlinse fürd Erin und d Anouk becho hend. Und ich ha mer no e tolli Wasserfläsche kauft, well ich eh immer z wenig trinke und da bi dere Hitz do umso wichtiger isch.

15.01.2024

Es Taxi he eus zum Railwailmarket gfahre. Det fahrt öppe 6 Mal am Tag de Zug direk durch de Markt, es isch so äng det, dass mer uf de Gleis mues laufe und rächts und links öppe e halbe Meter platz het zum uswiiche wenn de Zug chunnt, und alli Ständ müend wenn de Zug chunnt, d Sunnesegel ineklappe. S het mega vell Lüüt gha unds isch zwüschedure rächt grusig gsi (d Läbensmittel ligged eifach so ume und de Zug fahrt det auno so halbe drüber). Mer hend en Deal gha mit eusem Taxifahrer, dass er eus de ganz Tag umefahrt für en fixe Priis, und er isch eus det nochegloffe wie en Bodyguard.

Wiiter send mer no zum Wat Sam Phran (de Drachetempel). Det hani gmerkt dass mini neui Fläsche am Uslaufe isch und min ganz Rucksack unterwasser setzt het (🤡). Mer send denn dur de Drache wo sich ums Gebäude wicklet ufegloffe und hend vo Obe d Ussicht gnosse. Nachene send mer vo eusem Fahrer weder uf Bangkok gfahre worde.

Nachem Ässe send mer denn zunere Massage gange und ufem heiweg hend mer Roti Pancakes (typischi Pancakes für Thailad mit Banane) probiert und sind met eme Tuktuk heigfahre worde. Mer hend eus sehr in Thailand acho gfühlt nach dere experience.

🌻

Facts of the days:

• Wenn mer im thailändische Gastro schafft mues mer zwüschedure sehr, sehr tüüf süfzge. Verständlich.