24.09. - 11.10.23 - Irgendwo im Güggehüü 2.0

Jetzt send mer alli 3 weder vereint uf de Paradise Farm, wo öppe ein Stund entfärnt isch vo Williams Lake.
Do händ mer weder durchgehend Strom, well de vo Solarzälle bezoge werd und im Notfall au en Generator agöoh wärde cha, deför eschs Warmwasser begränzt uf 30 Liter und de Boiler werd natürlich au ned jede Tag agloh. D Mikrowälle und de Boiler cha mer ned glichziitig aloh wells susch d Sicherig usedätscht und d Wäschmaschine werd casual id Chuchi gschobe und det am Wasserhahn agschlosse zum Wösch wäsche. Abgseh vom mit chaltem Wasser abwäsche gets ganz vell Sache wo just make sense (🥴).
Usserdem schlofed mer imne Wohnwage, und da es i de Nacht doch ame scho rächt chalt wird, wached mer am morge imne Chüehlschrank uf.

Uf de Farm hets vell Tier um die mer eus müend kümmere, zwei Chälbli, 9 Hönd, 21 Hüehner, es paar Chatze und vell Ross. Zu eusne tägliche Ufgabe ghörds füetere vo de Tier, s zämeläse vo de Schiisi (de Pen vo de Doggos, de Hüehnerstall und de räst vom Garte, welld Chälbli döfed frei umelaufe).

Mer send go Bäum für Füürholz go fälle und dur de ganz Wald go schleppe, hend Sand über die ganz Wise in Hüehnerstall gschleikt, en 7 Kilometer lange Pfad dur de Wald zruggschnitte dass mer met em ross cha dureriite ohni dass mer de ganz Wald im Gsicht het und chli Laub grächet hämmet zwüschedure au no. Wenn denn no Ziit übrig blibe isch, send d Erin und d Anouk no go riite - vorusgsetzt mer händ d Rösser gfunde, well ihri "Koppel" bestoht useme sehr, sehr, SEHR grosse Stück Wald. Ja genau, WALD. 🙂

Einisch send mer "vermietet" worde an en Nachbarin vo eusem Host (wo schnäll en halb Stund Autofahrt wegwohnt) und hend ihre en Tag lang ghulfe, Röhre vom Bewässerigssystem izsammle und ufenes Depot z bringe. Zwüschedure bim Röhretransport händ mer de best Platz vorne i de Traktorschufle becho.

Immer am Donnstig finded s Square Dance statt, das wird immer inere Gruppe vo 8 Lüüt tanzed, wo jewiils als Paar ein Siite bildet, dass es am schluss ebe es viereck get. En Caller seit denn während d Musig lauft laufend die nöchste "Figure" aa und so tanzt mer eigentlich z 8ehöch metenand.
Zweimal send mer denn am Mitteoch no in Ballroom dance, wo sie eus d Grundschritt vom Jive, Foxtrott und Salsa bibrocht händ.

Zwüschedure beni 20gi worde und ha ned nur es feins zmorge und en sehr en feine Schoggichueche becho, sondern ben auno meteme Gruppearuef vo mine Friends überrascht worde (nomol es fetts danke a dere stell 🥹🫶🏻).

Am 11.10. isch euse letzti Tag be dem Host gsi und am Obe send mer nomol go tanze und aschlüssend uf es feins indisches Znacht im Hostel wo mer die Nacht wärde verbringe iglade worde. So schnäll ischd Ziit verbik gange und mer send ändlich weder id zivilisation cho - uf einisch cha mer ohni Thermounterwösch und Pulli schlofe und het glich gnueg warm und nachere Duschi met unbegränztem warme Wasser het mer de pfadilagerähnlichi Hygienestandard vo de letzte paar Wuche au weder chöne resette. S isch en sehr en gueti Macht i dem Hostel gsi!

🌻

• B wie britische Seefunk
• Mit chaltem Wasser abwäsche macht eifach sehr sehr hässig (und isch sehr gruusig)
• Warum wohnt mer im Güggehü und het nur kabutti autos?
• Hüehner sind chli blöd...
• Eier müend ihre Gschmack riife bevor mer si isst - je nach dem was met ehne vorhesch
• Mer stopfed gärn chemikalie i eus ine, solangs fein isch 🙂