12.10. - 15.10.23 - Back in Vancouver

Am 12.10. händ mer weder zrugg uf Vancouver wele fahre, doch de Bus wo am 11:45 hetti selle cho, het wägeme Stau so fest Verspötig gha, dass er ersch am 2 be eus itroffe isch. Het also gheisse: Warte und Chreisli ums Gepäck zieh oder schnäll es ¾ Buech läse.
De Tag het eigentlich wörklich nur us warte bestande, denn wo de Bus denn ändlich cho isch, hämmer emmerno die 8 Stundefahrt uf Vancouver abe vor eus gha.
Churz nach 10 send mer also denn weder a de Küste gsi und nach wiitere 40 Minute ÖV denn au i de Wohnig acho, wo mer för die nöchste Täg gmietet händ.
Churz vor Mitternacht het denn de cursed day agfange (jup, Friitig de 13. weder mol vom feinste erläbt), well obwohl i de Beschribig vo de Wohnig ageh isch, es heigi schlofplätz för 4 Persone, hets nur eis Doppelbett...
Egal, es Problem för nochhär händ mer dänkt und eus ufd Suechi nach Ässe gmacht, well abgseh vom Zmorge und de paar Snacks während de Busfahrt händ mer no nüt gässe. Nöchsts Problem: Im Quartier hets kei Läbensmittelgschäft i de nöchi und es isch au scho churz vor Mitternacht gsi, also händ die meiste Restaurants au scho zue gha - ussert de McDonalds, 2 Kilometer entfärnt. Also hets no en Hotgirlwalk zum Mac geh...

Freitag, 13.10.
Euses Glück isch denn grad wiitergange, d Vegis unter eus händ en Big Mac ohni Fleisch becho, wells Sortimänt so überragend vielfältig gsi isch... Und ufs Ässe sälber händ mer denn au nur no 20 Minute müese warte.
Nach wiitere 2 Kilometer hei (und ere neu entwicklete Angst vor Hecke - jetzt im Ärnst, d Grössi vo dene Hecke do wär i de Schwiiz so öppis vo illegal) send mer denn au ändlich weder be de Wohnig acho und händ eigentlich nur no wele go schlofe. Nach aber öppe 3 mal s Wc Spüele isch uf einisch en sehr höche und sehr penetrante Piepston losgange und het eifach nömm ufghört und nachdem mer mol alli technische Grät usgsteckt händ, händ mer müese feststelle, dass da Grüsch useme Rum chunnt, wo mer ned hechömed. Im Schlofzimmer ischs züm glöck ned ganz so luut gsi, also händ mer de Ton akzeptiert und händ eus z dritte is doppelbett quätscht.
Am Morge send me vo Vancouver gfahre und hend denn 3 Aläuf brucht bes mer en offene Tim Hortons für es Zmorge gfunde händ, wo sie denn d Hälfti vo eusere Pstellig falsch gmacht händ (🤡).
Nachdem send mer chli durch de Stanley Park Rägewald gloffe und händs schöne Wätter gnosse. Nacheme feine Smoothie im Pacific Centre und chli sprachlos vo de Medikamäntabteilig imene normale Supermarkt (det cha mer gfühlt alles ohni Rezäpt chaufe 👀) hets denn s znacht im schlofzimmer geh, well das tolle Pipse i de Wohnig natürlich weder agfange het.

Am Samstig hets en Tour durch verschidensti Second Hand Läde geh, well ich kei Winterjacke mitgnoh han (und mer i de nöchste Täg no richtig Rockys fahre wärde, wos scho Schnee her) und mer alli es Paar neui Hose bruched, well mer i de Ziit uf de Farm es paar mal amene Stacheldroht hange blibe sind und so es paar Hose kabutt gange sind. Erfolgrich händ mer eusi Tour chöne beände und händ eus am Obe met de "The Eras Tour" vo de Taylor Swift im Kino belohnt. Im Kino tanze und singe isch scho en experience die mer mol gmacht ha mues, het sich absolut glohnt!

De Sunntig isch för mech chli en ruhigere Tag gsi, d Erin und d Anouk sind as Måneskin Konzärt und scho am Morge go astoh. Ich ha chli Energie Tankt und mech mental uf die nöchste Traveldays vorbereitet.

🌻

Facts of the days:

• Isch schiinz es Ding in Kanada, znacht am 12i met Adilette in Mac z goh
• Was för riese Hecke wtf??
• D Eras Tour isch ned überbewärtet und scho nur im Kino en 10/10 experience gsi😍
• Z dritte imne Doppelbett isch scho schön kuschelig (aber guet för d emotional connection)