02.09.23 - Vo Wasserfäll und iis

Euse Tag het met es paar wunderschöne Wasserfäll gstartet, eine besser als de anderi - zum glöck händ mer gueti Rägechleider iipackt well scho nachem erste Wasserfall wäred mer ohni Rägeschutz sehr nass gsi. 

S Wätter het au sehr mitgspellt, immer wenn mer öppis händ welle aluege, ischs guet gsi (ame isch sogar d Sunne usecho!) umd sobald mer is Auto gstige und losgfahre sind, hets weder afange rägne bes mer bem nöchste Ort gsi send.

Zwüschedure send mer no schnäll a eine vo de tödlichste Stränd vo de ganze Wält. A dem Strand hets schwarze Sand (premium), aber mer döf ned znöch as Wasser und never met em rugge zum Meer stoh, well d Wälle send "deadly sneaker waves" (Ich empfihle youtubevideos dezue, sehr interessant die Wälle).

Zum Abschluss händ mer no d Diamond beach metgnoh, wo Iis diräkt vom Gletscher vor de Küste hetriibt. Au det hets Wätter weder metgspellt und e schöne Sunneuntergang zum Iis hezauberet. Und mer händ en Robbe gseh! 🦭

Am Obe hend eus es paar Lüt im Hostel metteilt, dass en 44% Chance bestoht, dass mer i de Nacht Polarliechter gseht, also send mer no ufd Wise usegstande und händ in Himmel gluegt (🌴🐝). S Liecht vo de "Stadt" isch leider z hell gsi (luut Robert) aber zwüschedure händ mer ganz fiin öppis grüens am Himmel gseh. Vellecht hämmer no Glück in dünklere Gebiet Polarliechter z gseh.

🌻

Facts of the day:

• Deadly Sneaker waves send sehr gföhrlich und sneaked dich is Meer
• Anouk het en deal met em wätter (immer wenn mer dusse sind isch guets wätter und sobald mer im Auto hocked fohts a rägne)
• Ich ha no nie so feste Wind erläbt wie do
• Fake Füüralärm in Hostels am 12i i de nacht sind sehe stressful