ninanesto
ninanesto
vakantio.de/ninanesto

Rio de Janeiro

Veröffentlicht: 06.10.2017

Wo mir in Rio acho sind, hetz zerstmol zwei täg lang gregnet zum empfang. Am erste Tag hemmer den denkt "chum mir gönd doch is Rio Sul". Ich Idiot ha mir aber nid viel überleit mit vier Mädels is grösste Ikaufszentrum vo Rio z'go. D Aline het mir den bibrocht, immer mit em Gedanke spiele :"brucht me das oder will mer das"?. De Spruch hani scho ca 500 mol brocht sit do.

Am Nommitag hemmer den die erst Tour quer dur de Dschungel vo Rio gmacht mit eme Kolleg vo eus, em Alan. Er het eus verborgeni Ussichtpünkt und Sehenswürdigkeite zeiget wo mer als Tourist nid eifach ane chunt. Unteranderem simmer ca 20 min lang in Dschungel gloffe um imne Wasserfall z bade! Trotz em Rege ischs es mega erlebnis gsi. Genau weg em Rege hetz en gwüsse Flair gha. Am schluss sind mir ine richtig cooli beiz en chline apperetiv go näh. 

Am zweite "Rege" Tag hend mir denn eh "Free Walking Tour" gmacht. Da zeiget dir Studente d Stadt, gratis. Du gisch ihne eifach soviel Geld wie du denksch das verdient hend. Jo, mir hend halt kein Student gha.. En 50 Jöhrige hochgebildete ehemalige Gschäftsma wo jetzt lieber de ganz Tag chli am umeschnorre isch. Und wenn er öbbis chan, denn Verzelle.. Am afang heter gmeint ca 3 h. Es sind schlussendlich fast 5 h gsi. Mir hend fast zu de Ohre us blüetet. Er het quasi jedi einzelni Tube ide Stadt kennt und dere ihren Familiestammbaum. Ah ja, Rio het ca 35'000 Kirchene, und d hälfti devo kennet mir jetzt. Aber mir hend viel erfahre und es isch sehr schön gsi. Isch ein Guter Typ gsi, de José.


Am 3 Tag simmer den endlich ad Copacabana go bade, es isch eifach en Traum. Abgseh das all zwei Minute eine chunt und dir Chäs, Kokusnuss, Bikinis, Wäschmaschine, Tischtüecher oder Marihuanha will atrülle. Uf de Sunneuntergang sind mir den richtig Corcovado ue. Mir hend en herrliche Sunneuntergang bim Monte Christo (Corcovado) dörfe erlebe. Isch eifach Atemberaubend gsi. 


Am zweitletzte  Tag hend mir eus ufteilt am morge. D Muriel, Sara & D Aline sind an Ipanema beach go relaxe. D Simone & ich hend eus vorgno  de Pedro da Gãvea z erklimme.. er lit uf ca 860 MüM.

Mit eusem Guide, em Winny hend mir eus uf de Weg gmacht. Dune isch uf em Schild gstande 2 h 30 min.. mir hends ih 1 h 50 min gschafft. Mir hend müese über Wurlze durch schmali Trails laufe. Unterwegs hets eh Bergquelle gha wo mir ganz frisches Wasser hend chöne trinke. Den isch de Part cho mit em Klettere. Schwindelfrei sött me si. 

Dobe acho hets mir d Sproch verschlage. En unglaubliche Usblick hend mir gha. 

Noch dere Asträngig sind mir den richtig Ipanema wo die andere bereits eus erwartet hend. Mir hend entlich chöne is chüele Meer gumpe und eh Is-chalti Kokusnuss chöne trinke. (Natürlich D Kokusnussmilch). 

Jetzt Checket mir gad us eusem wunderschöne erste Apartment us und ziend witer richtig Sao Paulo. Unterwegs mached mir no en halt ih de traumhafte Ilha Grande. Ihr werdeds gseh wieso das ich schrib "Traumhaft".

Antworten

Brasilien
Reiseberichte Brasilien
#riodejaneiro#copacabana#brasil#freewalkingtour