ninanesto
ninanesto
vakantio.de/ninanesto

Üsi Hireis noch Rio

Veröffentlicht: 03.10.2017

Am morge am drü bin ich us em Schlof grisse worde wos gheisse het "mir müend an Flughafe". Ich bi vo de einte Sekunde uf die ander heeeellwach gsi und mir ischs komisch worde. Übermotiviert han ich min Koffer gschnappet und mir sind richtig Klote gfahre. Wo ich am Check in Schalter zwei gstande bi, han ich mol de Muriel aglüte (rein sicherheitstechnisch) "hoooi jo mir fahred ezt gad ab", typisch. Nocher isch alles schnell gange, mir hend eus vo üsne Eltere verabschidet, d Vätere hend s letztmol üs ihren Rot mit uf de Weg geh. In Lissabon glandet hemmer scho s erstmol niemert meh verstande.. Mir sind go luege wen euse Aschlussflug goht. Mer hend den fest gstellt das er scho eh Stund verspötig het (segi normal, mir chönd üs dra gwöhne). Irgednwen hend mit den glich in Flüger chöne und hend sehr en ruhige Flug chöne gnüsse.. d Muriel het vo dene 10 h Flugzit ca 12 h gschlofe. Und da ich sozege ihres Küssi gsi bi, ich entsprechend weniger. Noch 27 Film wo ich/mir glueget hend, sind mir entlich im Tüfflug über Rio richtig Flughafe gfloge und glandet. 


Am Zoll hend mir den welle so schnell wie möglich use, ja mir sind sogar die erste gsi. Wo eus den Zöllnerin gseit het "wo sind euri Irreisedokument?" Mir hend den so en Fötzel müese usfülle... keeeeeei Ahnig hemmer gha wa mir wo müend ieschribe. Mir hends eifach gmacht. Als ich den relativ schüch und zurückhaltend en Brasilianische, grosse, muskulöse Zöllner gfroget ha ob ich das so korrekt usgfüllt ha, fangt de ah lache und seit "jooooo jooo, nur ie nur ie, interessiert doch niemert, keis Problem, Willkomme in Rio".


De Taxifahrer, wo eus ad Copacobana zu eusem Appartement gfahre het, isch entweder en Brüeder oder de Cousin vom Rubens Barrichello (Ex Formel 1 Fahrer) gsi. Hauptsach nur rechts überhole und mit mindestens 40 z schnell als erlaubt. Ah, und anschinend intressierts ihn nöd, dass wo mir am Flughafe abgfahre sind, d Tankazeig scho recht mager usgseh het, und het au öbbe 10 mol es Signal abgeh das de Vogel entlich söll go Tanke. Ich has Glatt gfunde.. Aber er isch en guete Typ gsi, er het eh chlini Stadtrundfahrt für eus gmacht und alles was erwähnenswert gsi isch het er eus verzellt. Mir hend ihm den 100 Reais geh (30 CHF) und sind is Appartement ie wo eusi Schwöschtere und d Sara uf üs gwartet hend. Mir sind no schnell ade Copacobana es zächs Stück Fleisch go esse mit labrige Pommes aber sehr feinem Bier. D Muriel het en feine Schnäggeburger gha.


Noher het s Bett gruefe und mir hend eusi Nacht sehr guet do in Rio verbrocht. P.s es Hammmer Appartement für schlappe 30 Chf pro Nacht.


Antworten

Brasilien
Reiseberichte Brasilien
#brasilien#rio