ninanesto
ninanesto
vakantio.de/ninanesto

Punta del Este

Veröffentlicht: 27.10.2017

Jo, mir hend s Paradies Florianopolis verloh, mit schwärem Herze und sind nach Punta del Este.

 Somit hend mir au Brasilie verloh und sind is zweite Land vo eusre lange Listä, Uruguay. Anschinend d Schwiz vo Südamerika wells so sicher seg und viel Wohlhabendi do heg. Mir sind zerst 5 h noch Porto Alegre gfahre, det acho hend mir schnell en Happä zNacht gesse und sind witer richtig Punta del Este, Uruguay. Mir hend denkt, well mir scho de ganz Tag fahred, buechet mir über dNacht en Leito Bus, wod nid nur de Sitz bizli abeloh chasch sondern richtig breiti Sitz hesch und relativ wit hine abe loh chasch. Es isch de HAMMER gsi. 

Guet erholt sind mir am Morge am 7ni in Punta del Este acho. Es isch es biz bewölkt gsi aber d Sunne het glich biz dure glueget. 

Mir hend denn denkt "chom mir nemet es Taxi, den sind mir det" mir hend jedoch no kei uruguayanischi Pesos gha sondern immer no Reste vo Reais. Und de Geldwechsler het erst ab em 9ni offe gha. De Taxifahrer isch den um de Block gfahre und ca 1 Min spöter het er gseit "mir sind do" und es wer ca 5 min z Fuess gsi. Er het den frechi 25 Reais verlangt, für das fahrsch 20 min in Brasilie. De Schafseckel, sorry. Selber tschuld sind mir. Mir hend s Gepäck abgeh und sind richtig Strand. Uf em Weg hend mir en Strosse Hund gseh, ich ha em denn pfiffe und er isch mir gfolgt als ob er mir wer. Mir sind an Strand und ich ha mit ihm ca 1 h lang gspielt, Stöckli hole, Loch buddle usw. Es isch echt lustig gsi.

 Naher sind mir im Hostel gsi, Geld gwechslet, ihchecket & z morge gesse. Üse erst Idruck vo Punta del Este, eher biz enttüscht. Es gseht biz us als ob 1980 öbber Zit aghalte het. Ha s Gfühl das da Städtli sini beste Johr hinder sich het. Im Hostel hend mir den lustigerwis es Schwizer Päärli troffe. Nach 5 Min rede hend mir gmerkt das ich mit ihrene Cousins id Schuel gange bin, d Welt isch wieder eimol meh chli. 

Noher hend mir eus den entschlosse zum Künstler Hus Casapueblo z go. S Wetter het biz umgschlage und es isch bewölkt worde. Es isch so verreckt kompliziert gsi zum mal de Liniebus finde wo det ane fahrt. Irgendwie hend mir das den gschafft und er het eus quasi uf de Autobahn use lah. Vo det us sind mir 20 min gloffe. Es isch es rechts wohlhabends Vietel gsi. Det acho hend mir den paar Föteli gmacht. Is Gebäude sind mir nid, het 15 Stutz Itritt kostet & hetsch nur zwei Rüm gse. 

Het biz usgseh wie eh Sandburg. Naher sind mir retour zur Autobahn & hend eus gfroget wen echt de Bus mag cho. Noch 50 Min warte inklusiv Müri müed Müri chalt isch den de blöd Bus ane gfhare

Zuegeh, bizeli Respekt hani gha bi dem Ablick haha. Am Hostel acho hend mir eus den entschide das mir am nächste Tag witer nach Montevideo reiset. Es git nid mega viel zum gseh und s Wetter isch au nid gad guet gsi. Mir hend d Wösch no schnell id Wäscherei brocht, und hends uf die 12i chöne go hole. Am 11i wer den usserdem au de Bus gfahre, da isch eus aber erst in Sinn cho wo mir noch em Dusche d Underhose aglueget hend "ouuuu da goht jo gar ned"! Ohjee.. schnell retour renne und froge obs echt früener goht, 10:30, muchos gracias. 

Usgschlofe, guet gstärkt vomne guete zMorge sind mir den uf de Bus. 

Bis bald

Ernesto & Muriel

Next Stop: Montevideo 

Antworten

Uruguay
Reiseberichte Uruguay