ninanesto
ninanesto
vakantio.de/ninanesto

Montevideo

Veröffentlicht: 29.10.2017

Montevideo

In Montevideo acho hetz natürlich gregnet als gäbs keis Morn me. Aber das sind mir jo eus gwöhnt, ich glaub langsam das isch so e Art a Begrüessig. Zum es Taxi ne hend mir 20 min müese astoh, ALLI fahret det taxi. Zum üses Hostel finde hend mir gnau müese aneluege, wells recht versteckt gsi isch.

Das Orange isch es, rechts vom Baum isch d Igangstüre. Mir sind ie cho und es isch es mega cools, mit Liebi gführts Hostel gsi.

Mir hend ihchecket und mir sind is Zimmer ie gloffe. Mir hend en 4er Dorm gha. Mir sind aber no ellei gsi, aber es werdet na 2 Gäst erwartet für das Zimmer. Ich bi churz go alles aluege und wo ich zruck is Zimmer cho bi, het d Muriel Schwizerdütsch gredet. Üse Zimmergenosse isch en Walliser gsi. Super, Spanisch isch momentan no schwierig zum verstoh und ezt muesi mi no meh konzentriere zum Walliderdütsch z verstoh. Er isch en coole Typ gsi wo eifach dehai los gange isch für unbestimmti Zit. Mir hend schnell gmerkt das passt und mir sind den zemme go zNacht esse. Ines traditionells uruguayanisches Restaurant. Ich ha nonig gwüsst was uf mich zuechunt.

Schnell hani gmerkt das es mir do sehr guet gfallt. Mir hend s beste Fleisch sit mir vo dehai gange sind gesse. Mir hend 450g Entrecôte für umgrächnet 12 CHF übercho. Ide Schwiz wür das locker zwüsched 50CHF-70CHF koste. Und es isch Butter zart gsi.

Scheisse, mir lauft ezt im Bus gad wieder s Wasser im Mul zemme weni dra denke. Schnell witer schribe. Am nächschte Tag sind mir bezite ufgstande, z Mörgelet und hend eus den uf de Wäg is Zentrum gmacht wo mir den ane Free Walking Tour sind. Uf em Weg det ane han ich ame Stand den so komischi Tee Becher gseh wo würkli jede zweit drus use trunke het und ich ha den gseit dasi de Tee mol usprobiere mues.

Uf em Plaza Impendencia acho hend mir die schöne alte Gebäude gse. Ich ha mich det scho id Stadt verliebt. Überall wot ane luegsch gsesch irgendöbbis, mit Liebi zum Detail. Das Gebäude isch bis 1998 s höchste vo Südamerika gsi. Und sin Zwillingsbrüeder stoht in Argentinie.

Ah ja, Argentinie und Uruguay hend en endlose Kampf gegenand. Bi allem was hend (alles isch recht änlich) het jede s Gfühl das wo sie hend isch besser, das hend mir schnell gmerkt währed de Free Walking Tour. Früener isch das ja bekanntlich eis grosses Land gsi. Mir hend eus id Gruppe integriert und hend gwartet bis los gange isch. Üsi Tourguide het eus begrüesst, wie chas au anderst sie, underem Arm e Thermoskanne und ide Hand so en Tee Becher. Sie het gad gmerkt wie ich de Becher astarre, wie en Hund es Guetzli. Sie het mi den gfroget obi mag probiere. Sie het de Satz nanig fertig gredet hani scho s Röhrli im Mul gha. En normale Grüentee wot ab und zue mal es paar Körnli abe schlucksch. Weiss au nöd wieso die so en Hype drum mached. Aber ich ha freud gha.

Mir hend gstartet und sind quer dur d Altstadt. Mega mega schön, würklich. Mir hend paar lustigi Sache erfahre. Wie z.b das in ganz Uruguay 3.3 Milione Lüt lebet, 1.5 Milione devo in Montevideo. Jede Iwohner vo Uruguay het quasi 4 Küeh. Es lebet 12 Milione Küeh in Uruguay. Findi guet, ich ha Küeh mega gern. Zuesätzlich het sie eus vo de Statue und Gedenkmole vo Persone wo mit Ross underwegs sind erklärt, was es mit de Haltig vom Ross uf sich het. Wens Ross beidi Bei uf em Bode het, isch die Persone ame natürliche Tod gstorbe. Wens eis Bei agwinklet ide Luft het und s ander am Bode isch die Person im Krieg gsi und isch nach em Krieg entweder ade Folge dra gstorbe oder ame natürliche Tod. Wens Ross stigt, beidi Bei ide Luft het, isch die Person im Krieg gfalle. Das segi International anschinend. In Montevideo hetz aber bim einte Denkmol en Fehler. De eint isch normal gstorbe, S Ross het aber 1 Bei agwinklet. De Italienisch Künstler hegi s gfühl gha es heg me Charme wens Ross so do stoht, das isch aber nid nach Norm, Kollege!!

Wo Tour fertig gsi isch sind mir am Hafe gsi, wos au en Fleisch Markt gha het. Jo ihr chönts eu denke, mir sind det ie. Es het usgseh wie es alts Bahnhofgebäude. Ine drinn hetz den ca 30 so chlini Beizli gha, jede devo het en Kohlegrill gha und alli hend tonnewis Fleisch uf em Grill gha.

 Es isch en rauchige Film ide Halle glege es het unglaublich guet gschmöckt. Ja, ich ha gmeint ich seg im Himmel. Mir hend eus en Tisch gno & hend z Mittag bstellt. Überall hends biz Gitarre gspielt, gsunge. Richtig gueti Atmosphäre. 

Nach dem hend mir eus vo eusem Walliser Kolleg trennt, mir sind is Hostels zruck und er isch an Hafe. Mir hend eus im Hostel es Velo gmietet & sind ca 45 min lang ade Küste no zu de Montevideo-Schrift gfahre.

 Dete acho hend mir welle paar Föteli mache, aber es het 4 Rentner gha, wo glaubs mit em Smartphone nid ganz klar cho sind. De eint het es Föteli gmacht, het s misslungene Föteli ade andere 3 wo genau z mizt uf em Platz gstande sind zeiget, alli 4 hend de Kopf gschüttlet und er het en erneute Versuech gmacht. Das Spieli het er den ca 15 mol gmacht. Entlich hend mir euses Föteli chöne mache!


Uf em Retourweg hend mir den welle de Sunneuntergang ame schöne Plätzli luege. Mir hend no biz Zit gha und hend uf dere ca 30 minütige Velofahrt paar Stops igleit. Underanderem bimene Fuessball Match vo ca 8 jöhrige Jungs, mega herzig. Biz witer vorne hend ca 50 Inder irgend en komische Sport gmacht wo irgendwie voll kei Sinn gmacht het für eus. Aber het au so usgseh als chöntets es mega guet. Isch glich lustig gsi zum zueluege.


Mir hend uf eme Mürli Platz gno und hend en mega Sunneuntergang gnosse. Nocher ischs recht schnell kalt worde und mir sind wieder is Hostel. Hend d Velos abgeh und sind ufd Stross uf de Suechi nach eme Restaurant. Mir sind bime Italiäner glandet. Ich ha mir sit langem wiedermol eh Pizza gönnt & d Muriel ihren lieblings Rissotto.

Zruck im Hostel sind mir den recht kaputt gsi, mir sind den relativ schnell id Federe. Am Morge hend mir schowieder eusi Sache packt und sind richtig Busbahnhof gange. Wo den im Bus no schnell es Kind nebed mir an Bode kotzet het und mir paar Sprützer as Bei sind bini froh gsi das mer hend chöne usstige. Jetzt sind mir im Bus richtig Colonia del Sacramento. Es alts Koloniedorf. Mir werdet det d Nacht verbringe und am Tag druf d Fähre nach Buenos Aires neh, 1 h. Montevideo isch echt mega schön, mir chönds nur jedem witerempfehle.

Bis bald

Ernesto&Muriel

Next Stop: Colonia del Sacramento

Antworten

Uruguay
Reiseberichte Uruguay