04.12. - 11.12.2023 - San Juan, Woche 1

04.12.2023

De 04.12. het am 4i am Morge in Montréal gstartet. Über nacht hets wie zum eus us Kanada z verabschide gschneit gha, doch de Uber het eus sicher über die Schnee und iisbedeckte Strosse zum Flughafe brocht, wo mer churz nach 7ni uf Charlotte, North Carolina gfloge send. Mer send met verspötig losgfloge, well bevor mer gstartet sind, ischs Flugi öppe no en halb Stund met ere grüene und enere rote flüssigkeit abgspüehlt worde (vermuetlich zerst de Schnee abzwäsche und nachene öppis geges veriise). Z North Carolina händ mer denn 7 Stund layover gha, bes vo det euse Flug uf San Juan gstartet isch. Churz nachdems Abschnallzeiche erlosche esch, send mer vo sehr starke Turbulenze überrascht worde (und s het en liecht panischi durchsag com Captain geh, dass sofort alli weder an Platz seled sich go aschnalle). S Bermudadrüeck het eus also sehr fründlich in empfang gnoh.

Z San Juan händ mer denn erstmol fast en Hitzeschlag becho, well obwohls 11i am Ove gsi isch hets no 25° gha und mer send no met de Pullis us Montreal usgrüstet gsi. En Uber het eus denn vom Flughafe zu eusne Hostels gfahre. Bem Znacht (chalti Spaghetti us de Dose) isch mer denn ufgfalle, dass de Mond kippet isch!

05.12.2023

De ersti Morge in Puerto Rico het grad demit gstartet, dass de Mond sich dreiht het (👀) und met eme Jobhunt f0r mich. D Anouk und d Erin händ beidi en Volunteerjob imne Hostel becho, wo sie schaffed und deför gratis det chönd wohne. Well de Dezämber aber Highseason isch, send alli Hostels scho voll und nömm uf de suechi nach öpperem.

Mer händ denn aber d Lüt us de Erin ihrem Hostel känneglehrt und sind zäme s erst Mol im Meer go bade. S Wasser isch mega warm und s het cooli Wälle gha.

06.12.2023

Nachdem ich is billigste (und räudigste) Hostel züglet ben, händ mer euse Tag am Strand verbrocht. Am Obe send mer met de andere Volinteers und andere Lüt wo mer känneglehrt händ in Old San Juan in Usgang unds isch sehr en vibe gsi.

07.12.2023

Wells billige Hostel doch sehr grusig gsi isch und ich mech det ned sicher gfühlt han, beni id Villa Eshta (det wod Erin schaffet) züglet, und will ich i de letzte paar Täg schomol det gsi ben und de Owner weiss, wer ich ben, hani för sehr vell billiger do chöne es Bett bueche.

Über Mittag send mer weder is Meer go bade, dasmol hets fasch gar kei Wälle gha. Am Obe send mer denn ines Shopping Center gfahre, uf de Suechi nach neue coole Summerchleider und ich ha en mega schöne Rock (met "hose"säck!!) gfunde.

08.12.2023

Nach chli grocery shopping und emne versuech is Meer go bade (s het so höchi Wälle gha und wennd scho nur bes zu de chnü dinn gsi besch hets dech mega starch inezoge) send mer am Obe weder in Usgang, well de letzti Tag vo enere Volinteer gsi isch. S isch en sehr guete usgang gsi, s send sehr vell interessanti sache passiert und mer händ cooli Lüt känneglehrt, so vell chani säge. 

09.12.2023

Nachem usschlofe send mer an Stand, d Wälle send weder chli besser gsi (s het mi aber einisch doch rächt verwütscht und wie inere wöschmaschine umegschlüderet) und lustigerwiis händ mer es paar Lüt vom usgang am Strand weder troffe.

10.12.2023

Well d Erin und d Anouk beidi de Morge frei gha händ, händ mer eigentlich Old San Juan mol bi Tagesliecht go aluege, aber well de Wätterbricht umgschalge het und räge azeigt het, händ mer eusi Plän gänderet und send in en Mall gfahre, well mer emmernoned alli Summerchleider gha hend, wo mer gsuecht händ. Bevor mer met de Suechi agfange händ, send mer imne Café glandet, wo Kafi im Sack verchauft het. Esch en experiece wärt gsi! Aber au det i de Mall send mer leider ned mega erfolgrich gsi, händ eus denn zum zmittag en feine Burrito gönnt.

D Erin und ich händ denn welle is Meer go bade, aber s het mega vell Seegras und Alge agspüehlt, dass es richtig grusig gsi isch zum inegoh. Mer send aber trotzdem pflotsch nass zum Hostel zruggcho, wells richtig agfange het rägne, also hets sich doch glohnt, s Badzüg azzieh.

11.12.2023

Z 5. send mer uf Old San Juan, d Stadt go aluege. S isch sehr härzig (aber au sehr heiss) gsi und mer händ schöni fläcke emtdeckt.

Mer send wedermol is Meer go schwimme (wenn mers Meer praktisch direkt vor de Huustür het, sött mer da au nutze!) und händ denn im Hostel znacht gässe. Mis Härz isch chli broche worde, well anderi Lüt usem Hostel gschribe händ, dass sie morn gönd g surfe und mer chönnte metcho - isch denn au so passiert, aber ich ha entschide, dehei z bliibe. S Surfe goht rächt id chnü und ich wetts ned riskiere, dass es jetzt weder öppis passiert unds schlimmer wird, obwohl ich so fest wett go surfe. S wird wohl no chli länger uf minere Bucketlist stoh bliibe. 💔

🌻

Facts of the days:

• Strand isch ja scho cool, aber uf de Sand im Füdlispalt chönnti verzichte
• Ich ha höt mega vell fottis gmacht... drü!
• Süsskartoffel!
• "Ich ha gester met em bugspray en linie zoge" (zeigt uf d türschwelle) "dass kei bugs me inechömed"