12.12. - 19.12.2023 - San Juan, Woche 2

12.12.2023

Die andere sind go Salzwasser trinke (go surfe) und ich ha d Ziit elei gnutzt, zum de Blog z schriibe, mis Journal uf de neust Stand z bringe und chli an Strand go sünnele (und mich ned z ärgere, dasi es kabutts chnü han 🥲).

13.12.2023

Am 13.12. send mer id nöchi vom Flughafe gfahre und händ det es gmietets Auto abgholt. Funfact am rand: online het mer autos för 5 (!!!!) Dollar chöne miete (d bewärtige send aber sehr schlächt gsi und vermuetlich wäred no vell anderi chöste dezue cho). 

Z 4. send mer uf Loíza gfahre, es chlises Städtli öppe e halb Stund vo San Juan entfärnt. Det händ mer ane Stell zum Fluss welle, wo in Reisefüherer beschribe werd, aber s isch sehr usgstorbe gsi und het sich denn als Private Property usegstellt. Wiiter send mer zunere Höli wo au als Reiseziel vorgschlage wird, was au chli en drifall gsi isch. 

Nacheme Stop bim Pizza Hut (ned empfählenswärt, isch die schlimmti Pizza wo ich i mim Läbe gässe han) send mer no öppe en ¾ Stund richtig Oste gfahre zu de Laguna Grande, eine vo 5 Ort uf de Wält wos Bioluminescence (lüchtendi Alge) het. Nachere gsperrte stross und eme abentürliche Trip send mer schlussändlich doch irgendwie zum Wasser cho und es isch so toll gsi! Sobald mer s Wasser aglängt het, hets wie 1000 chlini Stärnli im Wasser agfange glitzere und lüchte. Mer händ de Trip extra am Tag nach Neumond plant und wells so dunkel gsi isch het mers mega guet gseh lüchte.

14. & 15.12.2023

A dene Täg isch ned vell gloffe, chli Strand, chli läse, chli Journale. S Wätter het richtig umgschlage und zwüschedure het richtigi Wältuntergangsstimmig gherrscht, me hetti chöne meine, de ganz Ozean chunnt vom Himmel obenabe. Normalerwiis setts im Dezämber keis einzigs Mol rägne, d Rägeziit goht bis spötestens Novemver - well, das Johr ned... Aber wenigstens ischs warm und mer tröchnet schnäll weder.

16.12.2023

Nacheme Tag am Strand händ mer am Obe de anderi Usgangsort La placita no uskuntschaftet.

17.12.2023

Wells Sunntig gsi isch, isch weder Party i de Villa Eshta gsi und dementsprechend d Musig weder Lut. Wells grägnet het, ischs au ned so lustig gsi, an Strand z goh, wäg dem send mer zerst in KFC und nachene is Nomada gflüchtet. Am Obe ischs denn aber doch no chli schöners Wätter worde, dass mer det no händ chöne vor de lute Musig flüchte.

18.12.2023

Am 18.12. händ mers andere Hostel vo de Chetti wod Anouk schaffed agluegt, wells grösser isch und en Pool het. Mer hend det chli ziit verbrocht. 

19.12.2023

Nachdem mer uf Trip Advisor gsuecht händ, wo die ganze Schnorcheltoure zum Schildchröte gseh sind, händ mer usegfunde wo mer hemüend und send ohni en Tour i die Bucht gfahre und sälber go schnorchle. Mer send am richtige Ort gsi, anderi Lüt det send usem Wasser cho und händ gseit, es heig Schildchröte do, aber leider händ mer keini gseh (deför Iguanas und en Pelikan). Nachem erfolglose Schnorchle send mer aber no fein go Tacos ässe, bevor mer zrugg zu de Villa Eshta sind.

🌻

Facts of the days:

• The brochures!!
• Bioluminescence isch 10/10 worth it!!!
• "Chunnts guet?" "Guet isch vellecht chli es höchgsteckts Wort"
• Wältreis be like: uf Tripadvisor go luege wod Toure für zum Schildkrote gseh sind und sälber det he goh ohni öppis müese z zahle