Arequipa und Lima

Arequipa isch üsi nächschti station gsi, eigentläch aus startpunkt für üses nächscht trekking abentür ir witere umgäbig. diversi agenture hei aber wätterbedingt nid das abote wo mir nis vorgsteut hei, drum hei mir schlussändläch nume paar erhousami und sunnigi täg i dere stadt verbracht 😎

Arequipa het nis drfür um so meh gfaue. Au die guet erhautene kolonialistische gebäude, farbigi märitä und die gmüetlächä kafis hei dä abstächer schlussändläch glich wärtvou gmacht 😍

Vo dert simer richtig Lima, dhouptstadt vo Peru. Nid ä wahnsig spannendi stadt, aber mä chunnt fasch nid drumum.

Interessanter isch d situation vo dere 8 milione stadt: si ligt am Pazifik ir Atacamawüeschti u isch die trochnigschti houptstadt vor wäut, schiins sogar vor Kairo. D'wasserversorgig isch einzig u allei vo de gletscher us de Ande. D'klimaerwermig het im momänt ä guetä ifluss wüu die höchi gletscherschmeuzi viu wasser i de flüss mitbringt. Nume hei si keh plan B für i 30 jahr we d gletscher vorussichtlech verschwunde si...

Zudäm isch d armuet gross u jede verdient sini brötli mit mehrere jobs. Zum bispiu isch ä grosse teu vo de outos in Lima o aus taxi deklariert, de chöi si ufem wäg zur arbeit öper mitnäh u no öpis drzue verdiene. Aber genau hie muess mä aus turischt ufpasse wüu viu kriminelli ungerwägs si u si di höchschtens zumne mächschtä abglägne bankomat fahre. Üs isch das zum Glück nid passiert! 🍀

Zum abschluss no chli positivs, gässä hei mir in ganz Peru sehr guet u grad bsungers in Lima im La Mar... mmmhh! Lima het o zwöi vo de top ten restaurants wäutwyt, wo aber 2-3 monet im vorus müesstisch reservierä... 🙃