vor wüesti ad küste californias

warm blibts zum glück und drum nimis jetzt chli gmüetlecher. i verloh st. george, fahre churz dür arizona und in nevada bsuechi dr "valley of fire" state park. für mi e ungloublech schöne park. 2h entfärnt vo vegas wird dä erstunlecherwis nid vüu erwähnt, aber i gniesse die intensiv rote föuse, wandmolereie und sichte paar big horn schof.

um las vegas säuber machi e boge, bi schomou gsi und ha gad nid s bedürfnis gha zum nomou z'go. in henderson e swimstop imne tolle hauebad mit 13 bahne - e troum für jede schwümmer. es het no vüu meh so wüestestädt wosi absurderwis immer die grüenschte räse und schönschte gärte hei. es guets bispiu isch natürlech ou palm springs, palm desert und indio wo sehr vüu gäud investiert wird dases de riche ou a nüt manglet. bekannt isch do s'indian wells tennisturnier (roger!). immerhin nütze si i dere gägend d'sunne- und windenerige zimli guet.

e lustigi begägnig wedi no churz verzöue; frogtmi doch e betagti dame "are u looking for a wife?" mini antwort isch "oh yeah i'm always looking for a wife, why? do u have a nice daughter?" chli verruckt antwortet si "no, but have u ever heard the word cougar?!" und nach mire ussag  "yes of course i like this animal. what can u offer me? a nice house?" ischsi de igschnappt dervo. Komisch;)

ei tag hani no im joshua tree np verbrocht, sicher ou speziell mit dene böim und de kaktee, aber süsch heter mi nid mega überzügt. villecht bini eifach ou chli verwöhnt vode vordere parks.

und de isches sowit, zrüg am meer und ar küste vo california chumi a in carlsbad bir familie stults. 450m entfärnt wone si quasi am strand und marcia&steve heisse mi i ihrem schöne hüsli härzlech wüukumme. es isch e troum so z'wohne, (fasch) jede morge isch blaue himmu, zwüsche 20-25grad, jogge entlang am meer, mitem surfbrätt versuechi es paar wäue z'verwütsche, im ussepool vom stadt mit wassertemperature vo 26grad machi mini swimtraining, mitem velo erkundi die nöcheri gägend, spaziere im sang bi wunderschöne sunneungergäng und spile volleybau mit iheimische.

marcia&steve si sit 1-3 johr pensionert und drum isch ire autag zum glück nid so stressig und passt guet zu mim. 2 mou ir wuche isch dr zwöi-jährig colt (grossbueb) do und de ungernähmer mit ihm sache. deheime simer beschäftigt mit orange & manderindli (usem garte!) ässe, spilemer hüfig es chartespüu, diskutiere mit nang oder luege e füum. ungloublech tolli und härzlechi lüt, mängisch füehli mi scho fasch chli wie dr sohn wosi nie hei gha (3 töchtere - kei angst si si verhürotet oder nid im land). mitem steve hanis äntlech gschafft no es college football spüu go z'luege vode san diego aztecs vs. hawaii, d'liesl (28i, jüngsti tocher) isch mit is chino cho "free solo" luege (e empfählenswärte füum) und miter marcia tueni choche, ichoufe und süsch auerlei ungernäh.

thanksgiving isch chli angers usecho auses planet wär gsi. mir hei am vortag vüu vorbereitet und vouer neugier bini am 22. ufgstange. leider isch über nacht d'höufti vom hushaut erchrankt und si hei de das festmahl müesse absäge. somit heimer dä truthahn inkl. aune angere köschtlechkeite am druffougende tag gässe im chlinere rahme. dä fiirtig isch do extrem höch ghandlet und primär ischer do um familie zäme z'bringe, e gueti zit zäme z'ha und dankbar z'si.

i gniesse mis läbe am strand und wünsche aune e gueti wuche:)