utah's süde und die wichtige drü

nach jackson fahri innerhaub vo churzer zit dür 3 staate, wyoming, idaho und utah. die meiste städt/dörfer si dazumous vo europäische mormone gründet worde und drum fahri dür paris, montpellier, geneva und ou bern. entlang am bear lake isches chli wie bi üs ade seee, wunderschöni und äuä türi awäse, aber äbe doch chli angers.. nachem logan valley chumi de uf salt lake city ine woni gad chli überforderet bi mit 6 spurige autobahne und so vüu lärm und lüt. drum schnidi nur gad mini hoor (churz isch definitiv eifacher zum reise) und mache e swim/shower stopp im hauebad.

s'hauebad, s'infocenter & d'bibliothek si mini wichtige drü und aui heisi drü gmeinsamkeite. si erfüue fougendi bedürfnis vo mir; hygiene, uskunft/planig & wifi. das heisst i cha überau mis gsicht wäsche, zähn putze, wasser uffüue und ufs wc. d'mitarbeiter chömer froge beantworte und ideee gäh. und zu guter letzt, wifi macht viles eifacher.

acho im süde vo utah isches de äntlech wermer und es würkt aus wär immer blaue himmu - so passtmer! in torrey goni de äbe wieder mou so ines infocenter und wüus jo kei angeri lüt meh het, bini de scho gli dr sohn wosi nie het gha und am nöchste tag beschänkt mi die ca. 60 jährigi dame mit säubergmachtem öpfumues, cookies und öpis wie brot. mit gnue profiant touchi ih, ine ungloublech schöni landschaft mit canyons us verschidnige steiformatione und aues immer no mit herbstleche farbe. übernachte a paar mega fridleche orte und zum zähnputze betrachti dr atemberoubend stärnehimmu. capitol reef, bryce canyon und de zion. i de erste zwöi no fasch allei (wie bis anhin nahezu überau ide staate) isch de im zion chli meh los. es isch schliesslech ou dr 3. meist bsuecht np ir usa - vo gsamthaft 59! mir gfauter ou sehr, s'wätter isch nomou chli wermer (um die 20grad) und es het gäbig e fluss woni mi täglech cha wäsche - was fürne luxus.

äntlech bini wieder chli meh im sportmodus, vüu hikes und ua. hani e 26km run i canyon, ohni schmärze im schienbei, gmacht. in st. george bini i gnuss cho vo rockclimbing und de hani es paar täg mit iheimische verbrocht. i hami de ou entschlosse asi am sundi mou mitgo ine chile, so vüu amis si ir chile "the church of jesus christ of latter-days saints" (utah het e bevöukerig vo guet 3mio und über 2mio si member), asi wük mou ha wöue wüsse was derhinger steckt. okei i gibes zue, evt isch d'tochter vo dere familie womi zum früehstück und familiedinner iglade het ou no chli mitschuldig. dank mim mami (vererbt vom grossvati) binimer nie z'schad mit de lüt z'rede, i gloub wäg däm erläbi ou immer wieder mou d'gastfründschaft und de sisi bis jetzt sehr kuuli lüt die amerikaner.

okt bis mitti nov isch absolut die richtigi reisezit für die gägend, ab-und-zue chli früsch ir nacht weme campt, aber süsch sicher top. die angere touriste wos het si primär iheimisch und das chundmer nur z'guet.

ca. ire wuche wedi in california si und bi froh as die schreckleche wäutbränd dr ort nid beträffe woni higo.