s'läbe mit dr family stults in carlsbad

wow jetzt si scho 4 wuche vergange sit asi do bir family stults bi und si hautes immer no us mit mir! guet finge sis eher bemerkenswärt asis so lang mit ihne ushaute und gniesses heisi öper im hus.

sitem letschte blog hani nid mega vüu speziells erläbt, i gniesses eifach e iblick is amerikanische z'ha und schetze die gueti gsöuschaft & zit. mis glück womi ide erschte paar mönet begleitet het, het de leider eines morgens e pouse igleit. i verwache vorfröidig wöui e velotour nach san diego (~60km ar küste entlang) planet ha, wot mis natel aloh aber passiere tuet nüt. jeglechi tipps und tricks usem internet funktioniere nid und wöus handy jo nid läbenswichtig isch, radli los. in la jolla beobachti body-surfer wo zimlech grossi wäue allei mitem körper surfe und bi zimli beidruckt. dasch es föteli wärt dänki und packe mini kompaktkamera usem rucksack. schad nur, lotmi a däm tag ou mini kamera im stich (e systemfähler woni lut www-fore nid säuber cha behebe). jä nu ufrege bringt ou kei funktion zrüg und drum gniessi dä tag und die fougende 10 täg ohni fotis chli intensiver. weni nid allei bi ungerwägs gsi, hei zum glück die angere e momänt ufemne föteli chönne festhaute. und drum hets glich es paar fotis für öich gäh.

wasi süsch no so erläbt ha; mitem colt und dr marcia simer is legoland, bi in dütschland schomou gsi, aber lego si hout eifach toll. i läbe so haub vegan do wöu d'marcia zu 95% vegan isst und drum hani ou scho amne vegan-dinner teilgno. dr steve wot aber nid ganz uf aues verzichte (zum glück) und drum hets glich immer eier, müuch und chäs im chüeuschrank. es het sogar e tag mou grägnet und de isch aues grad überfluetet gsi und d'lüt völlig überforderet, aber ou froh heisi mou chli wasser vom himmu. ahl, die 2. höchsti liga im hockey, isch fasch interessanter zum luege aus nhl wöus vüu meh schlegereie und kuuli checks git, aber trotzdäm sehr guets hockey isch. d'liesl hetmi mitgno ine "bar method" klass, so chli e mix us yoga und ballet - isch intensiv & kuul gsi und het gäbig muskukater gäh. und he, i ha nidemou zit gha zum mis hahn im korb chönne zgniesse. mini chürbissuppe und s'curry si guet acho im hus. dr sichergloubt sieger steve hani im pingpong duell zrüg ufe bode ghout. abgseh vom forrest gump isch amerika gloubs kei grossi pingpöngler nation, in nordamerika könntme nidemou rundlouf. da d'marcia (+1person) gratis i zoo cha und dr colt gärn tier het, göimer i sehr bekannt san diego zoo. gseh d'tier zwar nid mega gärn i gheg, aber d'zoo hei jo nid nur negativi aspäkte. für abwächslig im sport hani es monets abi imne bouldergym glöst, de chani chli chlättere, üebige mache und verschidnigi yoga klasse bsueche.

i hätt nid dänkt, dasi bi däm wätter je ine wiehnachtsstimmig chume, aber d'amis si so verrückt nach dene fiirtäg, dasis ou scho fasch gmüetlech finge wenn am obe aues lüchtet und wiehnachtsmusig louft. drum isches gloubs jetzt doch guet verbringi die zit do mit ihne, d'marcia und ou mis mami möchte nid asi wiechnachte i mim outo verbringe.

e schöni adväntszit und frohi festtag :)

ah und sit 4 täg hani wieder es handy..