tobis_life
tobis_life
vakantio.de/tobis_life

letschte paar wuche usa

Veröffentlicht: 07.01.2019

..und immer no bini in cali bir family stults. nachemne gmüetleche wiehnachte und ereignislose silvester bini ou im nöie johr sehr entspannt und glücklech uf reise z'si.

d'festtäg säuber si de gar nid so speziell gsi für das, dass si im vorfäud aui sones riese tamtam drum mache. i meine si schmücke sogar öffentlichi böim (siehe foto)! aber i gloub si fröie sech eifach sehr, as d'family zäme chunnt. die erwachsene ching wo aui hei chöme vo ihrne studiums ir ganze usa. i ha vor auem fröid gha, dassme nachem wiehnachts-ässe cha e strandspaziergang mache und dasi ou ändi dez no dusse cha swime. am pool hani ou mi kolleg dr bob könneglert, är isch zwar 42 johr öuter, aber mit ihm hani paar kuuli sache gmacht; go basketbau luege & spile, burger & pizza ässe, bikini vode strandgirls beurteile und lo bechoche vo sire fründin dr lynn. im jogge wäri mitti dez langsam wieder bire agnähme pace acho, aber blöderwis hani aktuell problem miter achilles sehne, drum verzichti (scho wieder) ufs sekle im momänt. generell füehli mi aber zimli fit, dr guet usglich us yoga, swime und üebige macht sech bezaut. mi monetspass woni im "vital climbing gym" ha gha, hani mit 22 bsüech def usegschlage. d'speziau-yogastung mit fokus uf hangstand und verdräihge isch mi favorit gsi. d'marcia hetmi mitgno id cabin uf palomar mountain (1'800m) womer gmüetlechi 2 täg verbrocht hei. dr steve het leider us gsundheitleche gründ wäg sim oug nid chönne mitcho. am 1. jan het dr traditionell "polar plunge" (überau uf dr wäut bekannt) vom del mar beach stattgfunde. het zwar weni mit polar z'tue gha bi 20° warmem wasser, aber isch e witzige alass gsi mit apéro und geplauder. weme nid d'news luegt, chunnt meh nid gross öpis vom shut down mitüber. si hei jetzt aber in california dr yosemite und dr joshua tree national park gschlosse. si gspannt wie lang dr typ sini miliarde für d'mur no iforderet, es gseht nid us aus würde d'demokrate nochegäh.

da ig scho lang mou i six flags park ha wöue, hani das ufgspart bis aui holidays verbi si und das isch zimli guet ufgange mit nahezu keine wartezite. dankemne spezielle agebot (nur 10.- meh ausmi dr tagesitritt hätt kostet) hani jetzt es johresabi und somit freie zuegang zu aune parks ir usa. ha das de grad gnützt, 7min dervo im outo übernachtet und de grad es 2. mou aui verruckte bahne gnosse. dr tobi e tag allei im six flags; wie immer eis gehetze chum parkiert, i chönnt jo was verpasse! de uf d'bahn z'hingerst hinge im park, wehe öper louft schnöuer aus ig. ou yes uf keire bahn warti länger aus 10min (momentan lut crowd tracker die beste täg im johr), mängisch blibi 2-3 mou hocke und när gad witer stresse zur nöchste bahn. nach 3h hani die krasse rollercoaster düre, go 45min is outo go nappe und mi go verpflege (muess mine prinzip treu blibe). de nomou 3h uf die beste bahne und am schluss völlig erschöpft. mis fazit; zimli abgfahre, aues schnickschnack lösi losi und derfür hets 8 gueti (à la silverstar und blue fire) bahne. mini top 4: #1 - full throttle, #2 - twisted colossus, #3 - x2, #4 - superman. uf https://www.sixflags.com/magicmountain/attractions/thrill-rides gsehter d'bahne, de druf klicke und jedi fahrt uf youtube miterläbe.

mis 90 tägige visa louft i 2 wuche us und drum muessi usem land. nach langer überlegig hanimi entschlosse, dasi mis outo do loh, mitem flugi möglechst südlech nach mexico flüge und de à la backpacking dürs land wieder do ufe reise. mini letschte paar täg ir usa wirdi no mit stults (thank u so much for everything!!) gniesse und am 16. jan geits de los nach cancun (nid wägem ort, aber es isch dr büuigst flug gsi). fröie mi uf no chli meh summer und uf nöis :)

hoffe dir sit aui guets gstartet, hasta la proxima vez de mexico..

Antworten (2)

Jan
enjoy and stay healthy. continue reporting

Tiana
Mesmerizing!

USA
Reiseberichte USA