tobis_life
tobis_life
vakantio.de/tobis_life

vancouver - squamish - whistler - kamloops

Veröffentlicht: 01.10.2018

nachere 1:40h überfahrt vo nanaimo nach horseshoe bay fahri los ufem "sea to sky" highway richtig squamish (e richtig fridleche ort wo bekannt isch fürs chlättere, wind- & kitesurfe und hike natürlech). mache ou zwöi sehr schöni & populäri wanderige.

nach paar wundervoue täg gseht de aber dr wätterbricht für 4 täg eher trist us und de beschliessi zrüg richtig süde, nach vancouver z'fahre. d'strecki isch schliesslech schön, nur e stung und e kollegin woni vor insle könne isch ou no ir stadt wägemne haubmarathon. ire grossstadt bini natürlech schlächt bedient mitemne outo und drum gseht s'freedom campe mou chli angers us - aber i has gschafft;) hockey, sightseeing, festival, yoga und fuessbau stöi ufem program. nach 4 täg chani säge, vancouver isch e kuuli stadt und het definitv si charme, aber i fröie mi glich wieder uf d'natur und d'rueh.

d'sunne schiint wieder und so bewegi mi nordwärts. ungerwägs e absolut lohnenswärti wanderig ufe panorama ridge/garibaldi lake und när fahri in whistler ih. do geits nid lang und de verstohni äntlech mini bikefründe wo so begeistert si vo däm ort. es absoluts mekka für aui biker/downhiller, aber ou süsch outdoor freaks. i chume nid drumume es bike z'miete und es isch herrlech die singletrails und go sogar i skills park. leider schmärzt mis schienbei wieder meh (vermuetli hani ide letschte täg/wuche chli z'vüu gmacht) und i muess definitiv es paar täg ruehe. fasch chli "autwiber summer" wätter machtmer das zum glück nid au zu schwär.

dr fipu und d'tschüli (fründe vo deheim) heimi mittlerwile überhout, natürlech mitemne churze rencontre, drum machi mi de ou mou ufe wäg richtig rocky mountains. dr wäg über pemperton, lillooet, chache creek nach kamloops isch ungloublech toll bi schönem herbstwätter. i füehle mi wük mängisch chli ine western füum versetzt mit dene goldgräber städt, indianer schluchte/wiese und schöne seee. villecht isches ou no chli wöui am vortag ha e western gluegt;)

jetzt verbringi gad 2-3 täg in kamloops, hoffe s'nasse (scho fasch schneehafte) wätter vergeit gli und i cha de abem zisti mit de angere vo jasper nach banff abereise. es paar chauti nächt stöimer bevor..

i däm sinn wünschi aune vüu wermi und e gueti wuche:)

Antworten

Kanada
Reiseberichte Kanada