icefield parkway - calgary - edmonton

mit ca. -12 grad ir nacht isches de wük früsch gsi in jasper obe. nach eire ganz chaute nacht i mim outo (flüssigkeite simer aui igfrore), bini de froh heimi fipu&tschüli i ihrem (beheizbare) camper ufgno fürnes paar täg. vo jasper ufem icefield parkway abe nach lake louise isches mitem schnee und dr sunne e ungloublech schöni landschaft. in lake louise bestigemer dr "big beehive" und hei e tolli ussicht ufe see und abfahrtshang vo lake louise. DAS fotomotiv isch aber dr lake moraine und drum lömer üs ou nid lo ufhaute vore gsperrte stross (11km) und gniesse dr see ohni asiatischi invasion. am obe chochemer feini teigware (was wotsch no meh?!) und spile diversi chartespüu.

witer dür banff und canmore (probiere äntlech die kanadischi spezialität und muess säge asi "poutine" gärn ha - pommes, gschmouznige chäs und brotesauce) fahremer nach calgary. dört erläbemer e nhl match vode flames gäge d'vancouver canucks mitem ändresultat vo 7:4. mir gniesse s'ganze drum und dra vo däm erste saisonheimspüu und wärde no mitemne schau beschänkt. alberta, insbesondere calgary isch bekannt für ihri cowboy liebi (stampede) und drum passts, dassmer vorem match per zuefau no e westernritt-wettkampf gseh. mir si die einzige ohni cowboyhuet und -stifle;)

es isch extrem toll gsi gueti fründe z'gseh und i has definitiv gnosse mit ihne es paar täg dörfe z'verbringe! nachdäm mer üs verabschidet hei, hani mi ufe wäg gmacht richtig edmonton. obwou abundzue zb mou s'motoreliecht uflüchtet i mim outo, hetsmi bis jetzt noni im stich glo und nachere 5h fahrt hani de bir familie sommer ad türe klopft. bevor si in kanada 2009 es nöis läbe agfange hei, sisi mieter gsi bi mim grosi in zuchu und heimer dazumaus gseit i söuse de cho bsueche weni mou ungerwägs bi - jä settigi ussage merkimer de aube scho;)

jetzt bini scho e wuche do, ha mis erste thanksgiving (es 2. fougt de vermuetlech am 22. nov ir usa) gfiiret und füehle mi aus teil vor familie. mir diskutiere über gott und die welt, ässe guet, mache sport mitenang, schlife schlöf, mache fahrdienst für d'jungs (pascal 13i und simon 11i) id schueu oder hockeytraining und hei e gueti zit. es isch interessant e ihblick z'ha ine kanadische (und doch no chli schwizerische) autag. amne schöne tag hani e usflug gmacht i "elk island national park" und bison beobachtet und bi -1 grad (würi jo ir schwiz nie usem hus) bini es cfl football spüu vode edmonton eskimos go luege. d'cheerleaders lösech zum glück vor chöuti nid lo abschrecke!

d'temperature göi vom gfrüürpunkt wieder uf müudi 10grad ufe ide nöchste täg, ar nicole & stefan chani gloubs no chli häufe und i wett no es spüu vo beidne jungs gseh, somit bini grad noni mega pressiert zum richtig wermi (usa) abe z'go.

freudigi grüess id schwiz und bis zum nächsten mal, evt de us de staate:)