karibischs meer & e churz-trip nach belize

nachem aklimatisiere ischs backpacke de los gange. hami für isla de mujeres anstatt holbox entschide wöus extrem nöch und eifach isch vo cancun us. zwar sehr touristisch, aber def wärt z'erkunde für 2-3 täg. mit gueter gsöuschaft, imne kuule hostel (poc na), umso besser. e usflug mitem velo, pingpong-rundlouf, slackline, party, tacos ässe und d'sunne gniesse. am tag womer de wieder ufs festland zrüg göi, stürmts scho fasch chli (uf dr insle isch gad aues überfluetet) und drum buechi e zwüschenacht in cancun und gniesse s'home cinema (siehe foto).

collectivo isch e günstigeri alternative zu reisebus und wüus ou s'fortbewegigsmittu vode locals isch, reisi so nach bacalar. wow das chline städtli ar laguna de bacalar isch toll. ouso vor auem dr see isch ungloublech, so klar und perfekti temperatur, do chani nid angers aus täglech 2-3km z'swime. s "yak lake house hostel" isch berächtigt top bewärtet und mis deheim für 5 täg. s'kajake isch e besseri methode aus eher kostespiligi bootstoure und drum erkundemer so ua "cenote negro", wos türkisse wasser plötzlech schwarz wird und anstatt 3-4 meter isches 90 meter tüf. wunderbari sunrises dörfi erläbe und d'dankbarkeit dasi au die ungloubleche orte uf dr wäut dörf gseh isch sehr stark. nachdäm d'sunne ufgange isch, bedieni mi am feine fruchtbuffet und lomer die früsche papaya, melone, mango und banane ir hängematte schmöcke. ha ouso wük grund derzue glücklech z'si.

i erfahre as mi plan mitem ernöite ireise ir usa nid so eifach ufgeit, wöusi mexico und kanada nid aus usreiseland akzeptiere (oder jedefau isches risikohaft). aber ou in bacalar triffi witzigi backpacker und da iri route über belize nach guatemala geit, schliessi mi hout churzerhand ah und umgo das beschribene "problem".

es isch de ou nur 1h bis zur gränze und nach verschidnige bus- und taxifahrte, e lockere landesüberschrittig simer in belize city, dr houptstadt. abgseh vom änglisch wosi do rede und dr queen wo ufem eher türe belize-dollar z'gseh isch, dütet aues no ufne typische karribikstaat hi. versterkt wird das feeling mitem ufenthaut ufder insle "caye caulker". s'säubsternannte motto "go slow" chame a däm touriort sehr guet miterläbe, komplett outofrei, unzähligi fridlechi strandbars, superschöns meer und d'bewohner hei vüu gmeinsam mitem bob marley - wiesi usgseh und was si konsumiere. da das vorerst mini letschte täg am karibische meer si und meh seit es sig nachem "great barrier reef" in australie s'schönste riff (komisch das hani doch scho uf isla de mujeres ghört), goni ufne schnorchu-tour. und jo muess säge, es isch wük mega schön. mir gseh nurse sharks, stingrays, seepfärdli, turtles und unzähligi chlineri fische. mir finge ou es resti wo sehr authentisch isch, ouso es isch äbe eifach es hus wo d'mama für eim chocht - wunderbar. das läbe miter sunne macht fröid und i ha gloubs langsam ou gnue vitamin d tankt.

nach nur paar täg belize geits effektiv ou scho wieder witer richtig guatemala, sehr vüu schwärme dervo und i fröie mi uf bärglandschafte.

es lied womi sit de erste täg in mexico begleitet (a spanisch sprächendi, es geit nid um d'lyrics); https://youtu.be/VYtJAuoZxcc

gniesset dir witerhin dä schneerich winter, bis zum nöchste mou..