guatemala - land der vulkane

das land gfautmer vom erste momänt ah, d'lüt si extrem fründlech, es würkt sehr grüen und aues chli ächter. dr erst stop in el remate am "lago de petén itza" isch e troum; schöni landschaft, super ungerkunft (alice guesthouse) und es härzigs dörfli wo schwein, hüehner und ross über d'stross loufe. vo dört us machemer ou e tagesusflug nach tikal, e riese maya ruine nationau park, womer tucane und affe gseh. 90'000 mayas hei dört gläbt und es isch ua dräihort gsi vo "apocalypto" - e lieblingsfüum vo mir, wosi die abtrennte chöpf d'stufe vode pyramide abeschiesse.

vo flores us geits mitem bus über guatemala city nach antigua - e super schöni koloniaustadt, umgäh vo vulkan (sogar aktivi - siehe foto). witer zum "lago de atitlán" womer in san pedro blibe für paar täg und vo dört us chli d'region erkunde. s'hippiedörfli san marcos, dr gröscht märet chichicastenango und dr vulkan san pedro.

d'brichte uf tripadviser und diverse blogs si zimli negativ zur wanderig ufe san pedro, ide letschte wuche si mehrmaus lüt usgroubt und teils sogar verletzt worde vo lüt mit machetene. obwoui deheime versproche ha asi gwüss vorsichtig bi und nid naiv touristisch tue handle, hani mi am morge früeh ufe wäg gmacht - allei, es het niemer angers wöue mitcho. sehr liecht usgrüstet und mitem handy versteckt ide ungerhose hani am igang d'gebühr zaut und bi mitemne guide (e mönsch) losgloffe - mitem itritt gits dä derzue. nach nur 45min het är mir erklärt aser nid witerchunnt, zu vüu wärt isch ihm sis läbe. mit liecht mulmigem gfüeuh bini allei witergange. in höchster aspannig und mitere guete portion adrenalin hani dä gipfu innerhaub vore churze zit erreicht, schnäu d'ussicht gnosse, es foti gmacht und de gedeckt getarnt wieder zrüg. nur 2 angeri touris hani witer unge no atroffe, eskortiert vo 2 guides und 2 bewaffnete poliziste. zrüg bim usgang heisimer nid gloubt dasi dä hike wo normalerwis 6h geit i unger 2h gmacht ha. ok, evt isch das chli riskant gsi, aber i cha doch nid nöime häre go und de dä peak nid bestige.

das wärs de ou scho gsi mit mim guatemala ufenthaut und nachere eher müehsame reisetour, heimer die langwirigi immigration nach mexico hinger üs brocht und si in san cristobal acho.

es isch churz gsi und leider hani d'vulkanwanderige um antigua verpasst, aber i cha jo wieder go i das troumhafte land.

i bi chli hingedri mit mire brichterstattig, drum gits de wahrschindlech i 10 täg scho wieder eine. bis baud!