arizona/new mexico/texas - southern part

wäg vor küste fahri zersch über bärge und nach churzer zit dür wüestelandschaft, wome vüu mit quad-bikes gseht über düne gumpe. s'erst mou sit langem hani dr sunset im rügge und nid vormer, aber ou wäg vom meer ischer schön. näb unzählige solarfäuder, windreder und chuehhärde füehrt mi wäg nach tucson, arizona, woni dr saquaro np bsueche. saquaro isch e gross wachsende kaktus und dr höchst no stehendi isch 13,8m! uf empfählig fahri die spektakuläri passstross zum mount lemmon ufe - 2'792m. dört hets tatsächlech e skilift und dä erinneret mi doch fasch chli a boumbärg. mi erst und vermuetli letscht schnee dä winter. mache e churzi wanderig dasi mini wermere chleider mou wieder cha alege und bi de aber froh woni am obe in tucson wieder in flipflops cha umeloufe. glücklech und guetglöibig wieni bi, lohni mini loufschueh ungerem outo lo uslüfte, wieni das ab-und-zue mou ha gmacht nachemne hike und obwous e mega fridleche park in tucson isch, sisi de logischerwis wäg - bi jo ire stadt. die 130.- woni muess investiere (hase im dez erst nöi kouft und mit däm betrag läbi gueti 2 wuche (ohni benzin)) schmärze natürlech sehr, aber versueches vor positive site z'gseh, e penner het jetzt immerhin gueti schueh inkl. stinkendi socke. in südarizona triffi vüu pensionierti lüt wo iri winter do verbringe.

mi einzig räge ide letschte 2 wuche nützi zum nach las cruces in new mexico z'fahre woni dr tag imne sportzentrum abrunde und wasser-cycling usprobiere. witzig im wasser, aber ohni widerstang unagnähm für mini chnöi. ir nacht isches mit ca. 5° eher chaut zum im outo schlofe und drum blibi am morge lang unger dr warme dechi und tue läse. uf grund vo heftigem wind isch e stross gsperrt, aber dai cha champions league luege am nomi am 2, stresst mi das nid gross. dr nöchst tag isch wieder nahezu perfekt mit blauem himmu und ohni wind, ideau fürne bsuech im "white sands national monument". barfuess dür dä wiss sand über düne z'loufe isch herrlech und mit witziger gsöuschaft vo spring-breaker (im märz isch e wuche ferie ide schuele) umso besser. nid wit entfärnt hets 230m tüfi höhline, dr carlsbad caverns np. i däm unique naturschauplatz louftme zersch 2km abe und de chame, bi konstante 13° - egau weli johreszit, nomou 2km e rundi loufe und die ungerschidleche steiformatione bestune. wosi gseit hei es heig ou e lift hani logischerwis nur glachet, 3h spöter nachdämi fasch verzwiflet bi hinger dene schnoggende touris hani de gäge mis prinzip dr lift für ufe gno. ui wiemi das cha ufrege weni nid mini pace cha loufe! e liebe gruess a die womi könne vom wandere. new mexico, i gloubs so nöch ar gränze i däm staat chönntsch guet dürecho mit nur spanisch.

juhui d'temperature si in texas nomou es stückli wermer. bevori i süde abefahre machi no e zwüschestopp in alpine und gseh per zuefau no es baseball spüu. es workout und e duschi chani gratis (mängisch bini guet im so tue aus wäri e studänt) gniesse ar lokale universität. es witers highlight uf mire reis isch dr big bend np. sehr wenig bsuecht, zimli abgläge vo auem und ar gränze zu mexico, bietet är naturliebhaber enorm vüu. scho allei d'fahrt düre park isch phenomenal! dr rio grande büudet in texas d'gränze zwüsche mexico und dr usa und am spektakulärste isch das def bim santa elena canyon z'gseh. die zwöi höchste gipfle si schöni wanderige und ou dört hani wieder ungerhautsami begägnige - lüt zwüsche 25-56i wo no nie usserhaub vo texas si gsi. dr stärnehimmu isch wow! zum glück chani unbemerkt im mim van ufem parkplatz vom motel schlofe, süsch müessti 2h usem park fahre wöu aui campgrounds vou si. bide kontroustatione (wosi primär im süde ir nöchi vor gränze mache) sisi immer chli skeptisch, was e schwizer mitemne kanadische nummereschüud so wit südlech macht, aber winke mi logischerwis immer ohni lang froge düre. längi und ereignislosi 600km ligge zwüschem big bend und san antonio. hetsech gloubs glohnt hani mi probemonet bi spotify-premium beatreit. lueget mou uf dr wäutcharte, dä bundesstaat isch riesig - sogar d'amis säge es sig e "pain in the ass to drive through texas". dr six flags isch leider nur am weekend offe im märz und drum hani nur dr "river walk" und "the alamo" ufem programm. zwar schön gmacht mit bars, restis und vüu grüen, aber extrem vüu lüt und bim alamo machimer de gar nid erst d'müeh azstoh und lise im internet über das ereignis. churzfassig; es isch e schauplatz vore bekannte schlacht zwüsche texaner und dr mexikanische armee gsi. texas isch lang unabhängig gsi und ersch 1845 aus 28. staat zude united states derzue cho. evt isch das ou e grund wiso si irgendwie stouzer si do, mi gseht extrem vüu d'bundesflagge (nid z'verwächsle mit chile!) - natürlech näb dr usflagge. witer richtig oste ligt houston und wüus eifach nid lustig isch mitem outo ire grossstadt hani das ou scho gli hingermer. waffe heisi bis jetzt überau gha woni bi gsi ir usa, aber uffauend isch, as in texas bi jedem öffentleche gebäude explizit stot, dases gäge d'regle isch waffe ineznäh - bibliothek, supermarkt, schueu etc. oje oje!

es wird grüener und somit stigt mini vorfröid uf die für mi klassische 3 südstaate mit ihrem kuule akzänt. passend vo forest gump; "life is like a box of chocolate, you never know what you gonna get"..