letschte täg in carlsbad

es isch wük wie "heicho" gsi, d'marcia hetmi am flughafe abghout mit früsche manderindli und dr steve, dr colt & mi van hei deheim ufmi gwartet. dasi in phoenix es äxtra gspröch ha gha mit der immigration (bimers langsam gwöhnt), wöui anscheinend mitemne esta visa eich nur 90täg pro johr ir usa cha si, isch schnäu vergässe - ha dr stämpfu nach langem diskutiere becho. dr colt het während mim mexico ufenthaut mi name glert und drum ghöri jetzt immer wieder "tobi sit", "tobi come", "tobi don't".

zwöi wuche hanimer gäh zum das tolle kalifornie läbe nomou so richtig z'gniesse. morge am 6i uf zum i mi van z'ligge und delfine z'beobachte, lengine im ussepool schwümme, high school volleybau luege, dank schmärzfreier achillessehne miter loufgruppe km abspuele, mit fründe reisegschichte ustusche, ungloublechs college basketbau luege (das wär s'erste saisonabi woni wür choufe), läse am strand bis d'sunne ungergeit, churzi hikes ider nöchi, lustigi öbe mit spüu und movies, nie längwilig wärdende sunset-spaziergäng, am colt sini fortschritt im rede z'beobachte, plane für mi road trip, früschi avocados, manderindli und orange usem garte ässe. jo das wärs öpe so gsi - super gnosse hanis!

carlsbad (oder generell kalifornie) isch definitiv e ort wonimer chönnt vorstöue z'läbe. guet wär scho nid?! die 3 johreszite, sprich chasch s'ganze johr a strand, mit churze sache sport mache und hesch immer gnue vitamin d. innerhaub vo 1-2 stung bisch ide bärge und sogar ir wüesti. riesigs sportagebot. vüu lüt mitere gsunde und guete läbensistöuig. usw..

trotz es bitzli wehmuet zum tschüss säge, machemer üs ufe wäg, mi van und ig... tusig dank nomou a marcia & steve womer e super iblick hei gwährt i das kalifornische läbe am strand :)