southern states - louisiana/mississippi/alabama

mini erwartige wärde nid trüebt. chum bini in louisiana fahri dür wundervoui sumpfgebiet, sichte alligatore, bestune d'hüser uf stöuze (sitem hurricane katrina 2005 muessme so boue), brämse wäg schüudchröt uf dr stross und isse mis müesli am strand bi meeresrusche. es het ou vüu riese öl & gas abboufirmene wo mit jobs und guete löhn d'amis do abe bringe. obwou wasser immer mou wieder aues fluetet, isches d'houptnahrigsquelle vo aune iheimische und somit fluech & säge. vüu läbe i wohnwäge wöusi die tüüre husversicherige nid chöi zahle und damit si schnäu mit hab & guet dervo chöi wenns ir hurricane saison zu nass wird. über mängi brüg und sogar färe chumi nach new orleans. die stadt wo im ganze land bekannt isch für iri musig, guets ässe und kulturelli vüufaut. spannend isch dr mississippi river wo ig primär us huckleberry finn könne. ungloublech was do für frachte hinundhär transportiert wärde. traditionelli dampfschiff biete sightseeingfahrte mit jazz und lunchbuffet. ig parkiere imne ruehige viertu und nime d'färe für is french quarter übere, dä teil wome muess gseh. d'gschicht isch durchus interessant und erklärt das multikulti. isches zersch e spanischi kolonie gsi, de 9 sehr prägend französischi johr und sit 1812 ghörts zur usa. für mi isches wie ufemne grosse rummuplatz. weme sech nid cha entscheide bi wäm asmesech d'zuekunft wot lo düte, chame näbedra e poetry slam lo schribe lo, voodoo usüebe, waghausigi artiste bestune, e karikatur vosech lo erstöue oder eifach de begabte musiker zuelose. obwou nid jede tag e parade im gang isch, si die verchleidete lüt (wo anscheinend normau so umeloufe) ganz normau i däm mönschetrubel. trotz zauriche agebot fürne lustige obe, bini froh woni zrüg bi mim outo bi. i sött ufhöre jede fründlech blick z'erwidere - nid die besti idee ire hochburg vo homosexuelle.

nach däm touri-usflug chumi in mississippi i gnuss vom läbe im ländlechere hattiesburg. rick & lois si letscht august gest gsi im b&b uf vancouver island und heimer abotte weni im süde bi söui mi mäude. gesagt getan, wieni bi. wow si hei ouso nid übertribe mit irem awäse; 40 hektare land, e eigete weier wome cha fische, guet 20 chüeh, biene etc. i lere 3 vode 4 ching inkl familie könne und erläbe e chindergeburi, gottesdienst (nid zure chile derzue ghöre geit do gar nid), baseballgame und soccertraining. dr rick zeigtmer was är näbem awaut si (si schaffe beidi vou) so macht im garte und i gseh ihm wirds definitiv nie längwilig. mir luege basketbau im tv, "march madness" d'finauspüu vode colleges und ässe derzue burger vom eigete rind und am morge gits wurst vom gschossnige reh mit eier vode hüehner im garte. d'stadt isch bekannt für iri uni und drum machi e joggingrundi inkl. erkundigstour vom studiegländ - tolli gebäude. mi gseht generell vüu mächtigi hüser, d'gärte si im normaufau so gross as eich aui e rasermäiher zum drufhocke hei und mi fahrt äntwäder mitemne quad oder hout eifach mitem pickup truck zum gräteschopf - e troum vo üs jungs. usgrüstet mit pecannüss usem garte machimi nach 4 nächt uf, zrüg ad küste abe. im gulf island national seashore leri vüu über alligatore und mitem glück woni normalerwis ha gsehni es ~3,5m längs wibli.

die reptilie läbe im süesswasser, si chliner aus krokodil und hei e rundere chopf, rekord isch 4,35m und 475kg, es git dr american & chinese alligator, in südamerika gits kaimane und in afrika krokodil, wärde bis zu 50jährig, dr rügge funktioniert wiene solarzäue und drum sisi vüu am sünnele. si müessi nur ca. au 2 wuche ässe und zwar fisch, schüudchröt, waschbäre und süsch tier i dere grössi, hei im normaufau eher angst vor mönsche (nid so d'krokodil wo aus aggressiv gäute) und e funny fact; je chöuter as s'näst isch, desto meh wibli schlüpfe. dr alligator isch nid/nümm gfährdet.

in alabama bini chli enttüscht wosimer säge as die meiste dräihorte vo forrest gump in georgia und south carolina si gsi. immerhin durchqueri s'dorf wo dr babba gebore isch und wosi d'szene mitem shrimp boot gfüumt hei. es wimlet nur so vo seafood restaurants und händler. dr sand am strand uf dauphin island isch zwar schön, aber so richtigs beach feeling chunnt glich noni uf. e militärpark woni dra verbifahre isch leider gschlosse und drum chani nur es foti vor färni mache. no churz durch mobile und när isches das ou scho gsi mit "sweet home alabama".

es isch sicher e liecht angeri kultur aus zum bispüu in kalifornia, vüu meh afroamerikaner, d'ernährigspyramide isch vermuetli umbekehrt, recycling? umwäut? und d'mehrheit het vermuetlech füre karl* (name der redaktion bekannt) gvoted. obwou das eher chli negativ tönt, isches durchus erfröilech gsi die 3 staate z'gseh und dr akzänt isch doch eifach herrlech. dr südstaate-flair hetsmer defintiv chli ado:)

mit de badhose griffbereit machi mi uf ad sunne, florida is calling..