ninanesto
ninanesto
vakantio.de/ninanesto

Viñales

Veröffentlicht: 16.06.2018


Mit em alte Familie-Ami-Schlitte sind mir guet 2 Stund lang unterwegs gsi. Kurz vor em Ziel hend mir en Stopp binere Tabakfarm gmacht. Einersits hend mir sowieso e Tabaktour welle mache, da die aber "Pflicht" gsi isch, hend mir das nid sooo cool gfunde. Het me ane Kaffifahrt erinneret. Jenu, wenigstens hends no Welpe gha.


In Viñales acho het de Taxifahrer Eine nach em Andere bi dene Casa Particulares abglade. Im Stadtzentrum hets doch recht viel Touriste gha. Mir sind denn bi eusere "Familie" acho. D'Chefin isch scho uf de typische Terasse ghocket und het eus gwunke. Es het sich agfühlt wie wenn e gueti Bekannti eim nach langer Zit wieder begrüesst. Sehr herzlich und fürsorglich. Sie hend üs euses Zimmer zeiget und mir sind begeisteret gsi. Für 15 Franke pro Person es herzigs Zimmer mit zwei Doppelbett, Klimaalag, Bad und das alles würkli sehr suber. Es isch um die 14:00 gsi und mir hend grausam Hunger gha. Ich han denn de Husherr gfroget ob sie öppis für eus würet koche. Er het denn nur gmeint "Für z'Mittag ischs jetzt z spot, chönd erst am 17:00 z'Nacht esse". Do het er aber d Rechnig ohni d'Chefin gmacht. Sie isch gad zu eus cho und het eus verzellt was sie alles koche chan. Da sie Kuchichefin imne Restaurant isch hend mir das natürlich agno. Ich han nur de Fehler gmacht und gseit das mir SEHR hungrig sind. Grössti Fehler überhaupt. Ich han no nie so en überfüllte Tisch mit Esse gse. Und das alles für 10 Franke pro Person. Salot, Gmües, Fleisch, Ris, Suppe ect. 

Sie hend au e Tafle gha mit Aktivitäte. Mir hend nüme so viel Zit gha, hend aber glich no öppis wölle mache. De Nochbur het sich bereit erklärt mit sim Auto eus eigentlich alles z'zeige was es so i dere Gegend het. Mir sind denn mit de volle Büch los und hend als aller ersts e Höhli aglueget. Mir hend sogar no chöne mit eme chline Boot dure fahre. 

Nächste Stop isch e bemolti Wand gsi. Die genau Gschicht wüsset mir nüme. Ufallfäll isch es schön gsi. 

Nach dere Felswand sind mir anen wunderschöne Ussichtspunkt wo sich au es sehr bekannts Hotel befindet.

Am Abig sind mir is Zentrum vo Viñales, es grössers Dorf. Es isch das typische Kubafeeling überecho. Ganz viel Bars und Clubs. Überall dröhnt Salsa Musik us de Bars. Mir sind neimeds ie und hend dete Cuba Libre trunke und das spezielle Gfühl gnosse.

Am nächste Tag hend mir de erst schön Strand in Kuba agstüret. Cayo Juitas het er gheisse. Für das hend mir 2 h lang müsse uf de schlimmschte zerbommte Strosse fahre wo ich je erlebt han. Zwor sinds asphaltiert gsi aber hend über 10 Millione Schlaglöcher, teils so tüüf das me de Erdmittelpunkt gseh het. Am schlimmschte sind die letzte 2 Km gsi. Mir hend für die sage und schreibe 30 Minute brucht, mit em AUTO (natürlich unklimatisiert..). Es het sich aber meh als glohnt. De Strand stellt alles in Schatte was mir bis jetzt erlebt hend. 

Am nächste Tag sind mir denn witer. D Gastfamilie het eus wieder alles organisert. 


Next Stop: Playa Larga

Antworten

Kuba
Reiseberichte Kuba