ninanesto
ninanesto
vakantio.de/ninanesto

Grenzchaos Ecuador nach Kolumbien / Zwischenbilanz

Veröffentlicht: 19.02.2018

Grenzchaos Ecuador nach Kolumbien

Zerst han ich mol eusi Zwüschebilanz zoge : 

Strecke mit Bus : 13'428 KM
Strecke mit "Autostop" : 1725 KM
Strecke mit Auto : 1000 KM
Strecke mit Flugzeug : 16'153 KM

STRECKE STRASSE : 16'563 KM
STRECKE LUFT : 10'562 KM


Bi all dene Stecknodlene hend mir en Ufenthalt gha.

Warum Chaos a de Grenze!

Jetzt erfahred ihr wieso de Grenzübergang es Abentür gsi isch. Erstens: Die langstrecke Büs zum  nach zcho Cali kostet um die 150-200 Dollar, obwohls nur 6-8 Stund Bus fahre isch. De Grund isch de Zoll, es unglaublichs Chaos herrscht dete. De ander Grund isch, zwüsched Ecuador und Kolumbie isch es zimlich gföhrlich. Speziell grad direkt nach de Grenze vo Kolumbie. Die erste 2-3 Stund sind sehr bekannt betrefflich Überfäll. Die Strecki ide Nacht z’fahre wird eim vo de Locals zimlich stark abgrote. Also, mir hend müese so früeh wie möglich go das mir nid ide Nacht hend müese reise und irgendwie über die Grenze cho ohni Bus Ticket und ohni s Wüsse wenn und wo es e Transportmöglichkeit git zum nach Cali z cho. De Bus isch am 6:00 vo Quito richtig Grenze gfahre.

Mir sind schliesslich am 4:30 ufgstande und hend eus uf de Weg gmacht. Niemert het eus chöne sege obs öffentlichi Büs het. Mir hend also en Uber bstellt. Da mir jedoch chli usserhalb gsi sind ischs dementsprechend lang gange bis de cho isch. Mir hend 20 Minute gwartet und wo er bi eusem Hus gsi isch het er d Fahrt annuliert, keine weiss wieso. Also hend mir en neue bstellt. Mir hend gwüsst mir hend 45-50 Minute bis zum Terminal. Am 5:10 isch den eine cho. Mir sind los gfahre und er het sich scho verfahre, trotz Navi. So en Trottel. Ich ha ihm gseit er söll uf de Stell richtig fahre und sich Müeh geh, mir müend de Bus verwütsche am 6:10. Ufsmol het er den chöne richtig fahre. Am 6:05 sind mir am Terminal acho und mir hend gad no de Bus verwütscht. Mir sind den los gfahre und ca am 11:30 am letzte Bus Terminal in Ecuador acho. Mir hend es Taxi gno ad Grenze. Im Vorus hemmer scho ghört das me zum Teil lang mues warte ade Grenze. Mir hend denn denkt „Das kennet mir vo Bolivie, wo mir 2 h lang gwartet hend.“ Mir sind usgstiege und de Taxifahrer het gseit „Do müend ihr astoh, viel Glück!“ Es het usgseh wie im Europapark wos für die Bahne astönd, nur das jede no sis ganze Gepäck debi gha het.

 Mir sind hine agstande und hends eus bequem gmacht. D’Muriel isch den mol füre gloffe zum go luege wie lang die Schlange isch. Sie isch gfühlsmässig 1 h weg gsi. Sie chunt retour mit eme breite Grinse und seit „Am beste duesch de Rucksack ab und schmiersch Sunnecreme ih.“ D Sunne het abe brennt und mir sind den ganz ganz langsam vorwärts cho. Nach guete 2 h hends mir den endlich gschafft, mir hend dörfe us Ecuador usreise. Jetzt hetz gheisse uf Kolumbie übere laufe. Dete acho het eus fast de Schlag troffe. Mir hend gmeint die Schlange in Ecuador seg lang gsi. Es unglaublichs Chaos hend mir gseh. Überall sinds umghocket, Köffere verteilt ect. Mir sind den innerhalb vo 1 h ca 5 Meter vorwärts cho. Mir hend immer meh s Gfühl gha das es nid langet vor de Dunkelheit los z fahre. De Muriel hetz den glanget und sie isch zum Gitter gloffe wos d Lüt immer Tröpfliwis ie loh hend. Sie het mit em Tätschmeister dete gredet und chli Honig ums Mul gschmiert. „Es isch doch mega gföhrlich ide Nacht Bus fahre? Mir müend ebe no bis uf Cali und hend Angst ide Nacht! Wie lang gohts den no?“ Er het den nur gmeint „Da goht gar nid solang, wen ihr bis am 17:00 nid do vorne stönd den chönder zu mir cho und ich lo eu ie!“ Sie isch zu mir cho und het mir das verzellt. Mir sind gspanne gsi. Nach 1 h sind mir den doch scho 20 Meter witer vorne gsi. D Kolumbianer hend natürlich nid müesse astoh, die hends vorzue vorne ie loh, nomol en Grund me wieso das es solang gange isch. Ufsmol chunt eine zu eus und seit „20 Dollar pro Person und ich loh eu dur de Hinterigang ie!“ mir hend dem aber nid traut. Ich ha ihn chli beobachtet und es het für Anderi tatsächlich klappet. Eifach nur korrputs Saupack. Es isch den 16:55 gsi und mir sind nieneds gsi, nonig mol ide Hälfti. Mir sind den nach vorne gloffe und hend gseit das mir ie wönd. Er het tatsächlich s Tor ufgmacht und mir hend vor allne ie chöne und sind vor de Schalter gstande, mir hends chum chöne glaube. Es isch den ruckzuck gange und mir hend de Stempfel druf gha. Schlussendlich hend mir gueti 6 h gwartet. Mir sind den mit em Taxi nach Ipaiales gfahre wo de erst gross Busbahnhof isch. Dete acho hend mir gfroget obs en Bus nach Salento heget, das isch biz noch Cali. Sie het den gseit das gad jetzt eine uf Cali fahrt, vo det us sölled mir en andere Bus ne. Mir sind den gad in Bus igstige und am 18:15 sind mir los gfahre. Mir hends tatsächlich gschafft, vor de Dunkelheit hend mir das gföhrliche Stuck durchquert und mir hend chöne in Rueh pfuse. Die „Pech“ Sträne mit langem warte hend mir jedoch nonig hinder eus gha. Mir sind den am Morge am 5:00 in Cali acho und hend den e Verbindig gha uf die 6:00 is 3 h entfernte Armenia, e grossi Stadt nebet Salento. Dete acho hend mir natürlich gad uf de Bus wölle zum so schnell wie möglich im Hostel zsi, da mir nid würklich viel gschlofe hend. Mir hend wölle s Ticket bueche und es het gheisse „fahret erst i 5 h wieder Büs, mir hend es Velorenne do in Salento, d Strosse sind gsperrt. Ohje, mir hend eus es Restuarant gsuecht und hends eus bequem gmacht. Am 13:00 heds gheisse es segi guet, mir chönet de Bus neh. Jo, mir sind den 20 Minute gfahre und den hends es Gfühl gha me mües no e Ehrerundi mache. Namal e gueti Stund warte im Bus. Mir hends den nach 34 h gschafft, mir sind in Salento acho. Was mir in Salento gmacht hend erfahret ihr im nöchste Blog.

Ernesto Y Muriel

Antworten