ninanesto
ninanesto
vakantio.de/ninanesto

Baños, Ecuador

Veröffentlicht: 10.02.2018

Baños, Ecuador


Wie gseit sind mir mit em Nachtbus nach Ecuador. Natürlich mit Flipflops, kurzer Hose und Tanktop in Bus igstige, was für Wetter in Ecuador isch hend mir nid gwüsst. Mir hend fast kei Platz gha i dem Bus, die meiste hend scho pfuset und d’Sitz ganz dune gha. Ich bi chum in Sitz ie cho. Han den ca. 5 cm zwüsched Vordersitz und minere Bruscht gha. Erstuhnlicherwis han ich glaubs fast no nie so guet gschlofe obwohl de Fahrer gfahre isch als ob ihn 28 Polizei Autos jagget und er en riese Verbrecher gsi wer. Nach 2 h hend mir use müese zum de Pass abstämple loh. Denoch sind mir au scho in Ecuador gsi, es 7te Land uf eusere Reis. Die ganz Busfahrt wer 14 h gange. 

Mir hend aber nach 7 h müese umstiege. Ich Paradiesvogel mit de Flipflops und kurze Hose bin fast verfrohre. De Rucksack mit de Kleider isch im Gepäckrum igseprrt gsi will das ja nach 1 h wieder verlade worde isch in nächste Bus. Alli hend Kappene und Winterjacke agha und hend mich agluegt als ob ich usere Nerveastalt gflüchtet seg. Mir sind den richtig „Alpe“ gfahre. E mega Landschaft, würklich. Me het s Gfühl gha me seg ide Schwiz. E Mischig zwüsched Jura (Teils relativ flachi Landschafte mit Tanne) Appezell und Toggeburg wills eso hügelig isch und überall Bäum het und alles extrem grüen gsi isch. 

Eus hetz vo Ahfang a sehr gfalle. Mir sind den richtig Baños gfahre, das lieht ime Tal. Anschinend seg dete s’Wetter meistens eher schlecht ide Regezit, mir hend jedoch während em ganze Ufenthalt bombe Wetter gha.

 Mir sind acho und sind richtig Hostel gloffe. Es isch sehr es ruhigs chlises Städtli. D Lüt sind fründlich und alli kennet enand. Mir hend es mega Hostel verwütscht. Suber, gross, bequemi Bett. Mir hend 8 Chf zahlt inklusive z’Morge mit eme mega feine Brot (Mischig zwüsched Zopf und Gipfeli) und inklusive z’Nacht esse. Meistens öppis eifachs wie Risotto oder Teigware. 


Es isch Nomittag am 16:oo gsi und mir hend a dem Tag nüme viel gmacht. Mit paar coole Lüt Karte gspielt bis es zNacht geh het.

So isst halt d Muriel z'Nacht..:-)

Am zweite Tag sind mir den relativ bi Zite ufgstande und hend eus de Buch voll gschlage mit dene feine Zopfgipfeli und anere selber gmachte Brombeergonfi, mhhhhhhh. Mir sind den id Stadt und hend eus Velos gmietet. D Muriel het fast nüme chöne vor Freud, niiicht. Sie hasst Velo fahre und ich chum das amel au bizeli zgspühre über, wie bim Wandere. 

Mir hend jedoch super Bikes gha.

Bin michs aber langsam gwöhnt, im Endeffekt het sie immer Freud. Mir sind den uf die 28 Kilometer lang Strecki wo a verschidenschte Wasserfäll verbi führt.

 Zwüsched de einte Wasserfäll hend mir den anere spezielle Attraktion aghalte. Das nennt sich „Zip-Lining“. Mer hanget mit Metallrolle anes Drahtseil und raset über e Schlucht. Mir hend am Ahfang nur zuegluegt, han mich den jedoch kurzerhand dezue entschlosse zums mache. Für 15 Dollar hesch chöne eimol uf die ander Site vo de Schlucht und wieder retour. Ich bi uf de Turm ue kletteret mit mim Gstältli und dene Metallteiler wo mer bim Seil ihänkt und ha uf de Guide gwartet. Er isch cho, ohni öppis zsege het er sich as Seil agmacht & isch devo. Ich bi det gstande wie bstellt und nid abgholt. Ich ha mich den gfroget ob ich mich selbstständig mues amache oder was. D Muriel het den gmeint das seg kei gueti Idee. Es isch den nach 5 Minute eine cho und het den biz a mir umegrisse. Er het den mit eme alte Strick mich a die Metallkonstruktion ane bunde und e ich öbbis ha chöne sege ob das au sicher gnueg isch het er mir scho en Schupf geh und ich bi über das Tal gfolge wie en Vogel oder wie de Superman. 

Uf de andere Site acho han ich müese en Berg duruf klettere und vo det us het mich wieder eine hobbymässig ahgmacht und het mir wieder en Schupf geh. Es isch echt cool gsi und für das, das es so spontan gsi isch han ichs umso meh gfühlt. Mir sind den wieder ufd Velos und sind witer gfahre, ich mues ehrlich zuegeh…..bizeli zitterigi Knü han ich gha. De letzt vo dene Wasserfäll isch den au de bekanntischt gsi. Mir hend ca 20 Minute müesse e Schlucht durab laufe. Vo det us het mer den bis hinder de Wasserfall chöne laufe. Me isch jedoch pflutschnass worde und es isch brutal eng gsi. Me het verschideni Perspektive gha und het viel Föteli chöne mache und die Wassermengi chöne bestuhne. 

Es het sich agfühlt wie en tüfe Basston, das Wasser wos dune zemmegschlage het. Mir hend den wieder alles dörfe duruf laufe, komisch ezt sinds ufsmol 40 Minute gsi und dobe acho het mer no uf die ander Site vo de Schlucht chöne laufe. Das händ mir au gmacht und die Sicht isch fast bizeli besser gsi. Mir sind ame wunderschöne Weg am Fluss nogloffe und hend e super Natur gseh.

Wo mir den die Wasserfäll öppe gseh hend sind mir uf de Transporter richtig Baños. Es isch en normale Lieferwage gsi wos eifach dVelos über d Ladeklappe gheit hend. Mir sind den uf lose Holzbänkli ghocket. Me het sich gfühlt wie e Sau wo uf em Weg richtig Schlachthof isch. So isch er au gfahre.

Am nächste Morge hend mir eus de Buch wieder vollgschlage mit dene Gipfelizopfbrombeergonfibrötli, mhhhhhh…. Den het eus de Bus abgholt. Mir sind go River Rafte. Was isch das? Mit eme Gummiböötli z 7te en wilde Fluss durab fahre und fast us em Boot gheie. Mir hend jedoch en Neoprenazug becho und Helm und Schueh. Mir hend den schnell en Crashkurs becho wie mer eus verhalte müend falls mir usegheiet, und mir werdet use gheit.  Das allerwichtigste isch "Zerst s Paddel wieder is Boot ie, das isch eues Ticket zum wieder is Boot ie cho. Kei Paddel - Kei Boot!" Das het er den ca 10 mol wiederholt und mir hend gmerkt, dass ers grausam ernst meint mit dem Paddel.Ninnt mich ja Wunder was eis Paddel kostet. Mir hend den uf 1-2-3 s Boot glupft und hends richtig Fluss treit. Chum sind mir uf em Fluss gsi het eus d Strömig mitgrisse. Es git vo 1-6 verschideni Stufene. 6 wär unmöglich zum uf de Fluss go, mir hend es guets 4i gha, perfekt also. Mir hend es guets Team gha. Ich und de brasilianisch Hugo sind z vorderst gsi. Die wo immer die voll Ladig is Gsicht becho hend. D Muriel und eini sind hinter eus ghocket. Hinder ihne sind zwei Koreanerinne ghocket. Wie euse Guide immer so schön gseit het „Go Go Go Hyundai Motor und Turbo Diesel“. De Guide isch z hinderst ghocket und het eus umekommandiert wie ichs no us RS Zeit kenne. Entweder isch er mol en Drill-Sargent gsi oder het sus en Egge ab gha. Es isch mega lustig gsi, vo allne andere Teams sind regelmässig es paar us de Boot gfloge. Bi eus kein einzige. Es het zum Teil grausam gschlage und isch ue und abe gange. Me het sich recht müese hebe und mit de Füess klemme. Zuegeh, 2-3 mol hend mir also recht Schwein gha. Fast währet mir kippet. Nach 2 h hends mir jedoch gschafft und mir sind stolz gsi.

Am zweitletzte Tag sind mir den is berüehmti Baumhus vo Baños gange namens „Casa del Arbol“. Das isch uf eme Berg obe und links und rechts vom Baumhus hets Schauklene wo mer über de Abgrund chan schaukle, zimlich lustig.


 De ganz Morge isch es bewölkt gsi. Mir sind am Mittag uf de Bus und zack hetz blaue Himmel gha. Es isch mit eme alte Klapf de Berg uf gange, ca 40 Minute. Dobe acho hetz fast kei Lüt gha und mir hend 2-3 mol chöne gireizle und hend riese de Plausch gha. 

Es het no so e Art Zipline gha wo mer gege enand het chöne es Renne mache, d Muriel het mich natürlich sofort herusgforderet. Ich ha gwunne, mit Abstand, gell Schads (Ahmerkig vode Muriel; jo, hetter. Es git leider es Bewiisvideo, sust würis abstriite ;) ). 

Nach dem hend mir den namal schnell welle go gireizle und es het ufsmol grausam viel Lüt gha. Sie sind bis zunere Stund agstande und hend den aber nur 5-10 mol chöne schaukle bis wieder abe hend müese. Eis Glück sind mir am Mittag gange wo mir praktisch ellei gsi sind und mir hend solang chöne druf blibe wie mir hend wölle. Mir sind den wieder zruck is Städtli und den isch au scho die letzt Nacht ahbroche.

Am Tag druf hend mir zum z Morge eus d Büch vollgschlage mit dene unglaublich feine Butterzopfgipfelibrötli und Brombeergonfi, mmmmhhh… Mir hend packt und sind richtig Busbahnhof. Nächsts Ziel isch d Hauptstat Quito. Mir wüssed nonig we lang mir det blibet, mir gönd ezt mol go luege.

Nest Stop: Quito

Bis Bald

Ernesto Y Muriel

Antworten

#ecuador#baños#schaukel#baumhaus#southamerica#südamerika