Nosara CR :)

Nachere relativ abentürleche Fahrt, bini am Samschti z Nosara acho. 

Schinbar fahrt mä hiä mitm Outo düre Wald, bevor d Flussüberquerig asteit u zum Dessert wird mä när no gäbig düregschüttlet :) Ja d Strasse hiä si nid ganz z vergliche mit dr Schwiz. Wenns lang nid rägnet, düe si so e Melasse (uf Malzbasis) ufd Strasse, damits weniger stoubet. Ah ja u d Töfffahrer hei e Skibrüue anne wägm Stoub, aber dr Helm kenne si nid.

Uf jede Fall isch Nosara es härzigs Surferdörfli mit viune guete Restaurants. Hiä hani mi mit Fründe us dr Schwiz troffe, wo mir es super Hotel empfohle hei. The Mango Villas B&B. Fägt mega wenn mä mit guete Lüt ungerwägs isch. I däm Hotel isch no es Päärli us San Francisco und es Päärli us London. Di letschte Tage si mir chli mit ihne ga surfe u ässe. Äs isch immer wider spannend z ghöre, wis dr Alltag i anderne Länder so ablouft.

Z Zmorgebuffet i üsm B&B isch dr Hammer. Näbscht däm hets es Salzwasserpool, sehr viu Böim u Pflanze und mega viu Tierli. Waschbäre, Nasebäre, Vögu etc. Ah ja, i ha no so e nätti Spinnele ufm Chopfchüssi gha woni iz Bett hätt wöue haha. U vorhär bini no vomne Gecko agschisse worde, aber das bringt ja schinbar Glück...oder so ;)

Meischtens gö mir vorm Zmorge hurti a Beach (ig ga jogge u di Andere ga surfe) när verlouft dr Tag zimlech gmüetlech, so wis söu si. 

Hüt bini am Nami o no hurti ufs Surfbrätt gstande :) 

Pura Vida - i bi happy

Am Donschti geits de retour nach San Jose u am Friti für mi wyter nach Guayaquil.