#6 - San Andres

Ursprünglich isch üsen Plan gsi, zum noch Cartagena mitem Bus i vier Stund noch Santa Marta wiiterzreise und evt denn nochli wiiter uf Taganga. San Andres hemmer sogar eher schochli abghogget, weils doch schiinbar sehr touristisch söll sii. De Dani het den e Telefon gha mit sim sehr guete Fründ vo Brasilie und de het üs die kolumbianisch Insle, wo aber nöcher bi Nicaragua isch, nomol as Herz gleit. So chunts, dass mir eifach mol lueged, obs überhaupt für de nögscht Tag en Flug het und natürlich hets gad au en passende am 16.50. üsen Host in Cartagena chunt üs sehr entgege, dass mir sogar d Wohnig bis denn dörfet phalte und drum au üses Züg nöd mönd de halb Tag umeschleppe. 

Weil mir glich scho bitzli Erfahrige hend chöne sammle a de Flughäfe do, fahremer am 14.30 ab, weil da füren Inlandflug vorig langet. Weil mir au gad scho s Checkin online gmacht hend, chömmer sogar au ide Fast-Line aastoh. Damit mir kei Buess zahled, hemmer Tickets im Radisson nebetdra usdruckt. Mir chömed also zitlich völlig passend an Checkin-Schalter und alles passt mitem Gepäck usw. bis zu dem Moment wo sie üs nochem Retourticket frogt. Natürlich hemmer da nöd, weil mir jo spontan unterwegs sind. Nödmol de Rückflug hei langet. Sie seit üs, mir mönd bis am 15.05 sTicket für de Rückflug ha, sus chömed nöd go. Es isch 14.56 und ez mu alles ganz schnell go: mitem Handy en Hotspot mache, in Onlineservice vode viva colombia, ticket chaufe für i vier Tög zrugg, Pass abtippe und wieder an Schalter hetze. Gschafft! Ab dur Passkontrolle und zum Gate, wo dLüt scho am Boarde sind. Ez no schnell sVisum chaufe und zFuess zum Flugzüg und iistiege. Mir hends tatsächlich gschafft und landet 1.5 Stunde spöter uf San Andres. E riese Chaos a dem Flughafe weil gad zwei wiiteri Flugis glandet sind und ufem Gepäckband alles mögliche deher chunt. Zum Glück isch aber au üses Züg debii und somit chömmer use, wo usem Host Albert sind enge Fründ, de Jobsaas scho uf üs wartet. Er fahrt üs weg vode Touiste im Oste direkt ad Westküste und vezellt vo sinere Fründschaft zum Albert, sinere Reaggae-Band und vode Insle. Endlich isch do wieder Englisch die erst Sproch und skreolisch Englisch. Spanisch lernets nur ide Schuel. 

Mir werdet unglaublicv warmherzig vom Albert empfange und vebringet de ganz Obet mit em. Esset Streetfood und trinked spöter zwei Fläsche Wii bi sehr interessante und schöne Gspröch. Mir sind Teil vo sinere Familie, scho ez und er ladet üs für de Mittwoch ii ane Konzert vo sinere Band. Als Sänger giter üs am Obet scho 3-4 Kostprobe vo sine Lieder mit Theme, wo aktuell d Insle beschäftigt. Tüüfer iigo uf dErlebnis mit em tömer e anders Mol.

Mir gönd bald is Bett und hend e ruhigi Nacht.

Ez mömer leider ufhöre schriebe, er het üs gad e frischi Kokosnuss vom Baum gholt.