#7 - Mir bliibet

Üsi erste Täg in San Andres vebii und sWLAN loht au wiedermol en Biitrag zue. Die Insle isch eifach nu wunderschö. Agfange bi de lange, fast wiisse Stränd mit weichem Sand, stürkisfarbene Meer, die agnehme Temperature, s sehr feine Esse, de nette Lüt und s wunderschöne Grüe uf de ganze Insle. Mir fühled üs wohl im Dehei vom Albert und hettet mit em kein bessere Host chöne vorstelle. Er isch unglaublich hilfsbereit, wie mir da nonie bime Mensch, wo üs chum kennt, erlebt hend. Es git nüt, wo er nöd probiert möglich mache und es isch praktisch alles möglich, weil er mit de ganze Insle venetzt isch. Mir hend em am erste Obet scho vo üsem Rückflug vezellt, und dass mir doch lieber wöred bliibe. Bereits am nögschte Tag hetter enere Fründin an Flughafe aglüte und abklärt, dass mir vo Ort de Flug chönd umbueche, au wenn mir bim Visum öpis anders ageh hend. Vo Afang a seit er i sinnere gwohne, entspannte Art, dass alles scho guet chunt und er scho Lösige het. Damit mir sUmbueche ohni Problem chönd mache, hetter üs gad au en Roller organisiert, wo üs am nögschte Tag am 8i brocht worde isch (mir hend nödmol irgendwo ein möse go abhole). So fahremer also an Flughafe und buechet üsen Flug mit Händ und Füess um - und velönd da Paradies erscht wieder am 1. März. Zrugg dehei freut er sich genauso wie mir über dNeuigkeite und buechet bi em gad wiiteri Nächt. Leider isch sHüsli aber für 4 Täg vemietet und so organisiert er üs selber e neui Unterkunft gad ide Nöchi vo em. Aso es isch meh e chlini Villa, wo klar au üses Budget gsprengt hetti. Aber au da vehandlet de Albert gschickt und zahled schlussendlich glich viel wie bi em. Mir stuhned eimol meh über sini Hilfsbereitschaft. 

Zrugg aber zu üsem Roller-Tag: Wer jemols au uf die Insle chunt, dem empfehlemer würkli so ein zmiete. I wenige Stund isch die ganz Insle abgfahre und alli Lüt sind ruhig und gediege. Es git kei Stress, kei Gedränge und ghupet wird nöd zum flueche sondern zum warne, dass me chunt. Mir haltet so also a wunderschöne Stränd, a einere vo dene unzählige Cocktailbars direkt a de Stross - weil uf de andere Siite stürkisblaue Meer liit oder eifach bi dene Hüser, wo die Iiheimische ihres entspanne Lebe füehred. Mir merket guet, so öpis wie Stress gits do nöd.

Die ander Möglichkeit - und mindestens so erlebnisriich - isch e Fahrt mit de unzählige Büs do. Es git kein Fahrplan und au kei Haltestell. Me winkt wenner chunt, zahlt umgrechnet 80 Rappe (egal wie wiit me fahrt) und rüeft em Busfahrer, wenn me wött usstiege. S beste isch, dass me em Busfahrer au cha sege, wo er söll halte, wenn unklar isch, wos gnau isch (i üsem Fall e Fischrestaurant). Klar chas so passiere, dass e Busfahrt recht lang goht - aber mir hend jo au vooorig Ziit. 

Die nögschte Bricht werdet also wiiter vo San Andres folge, weil mir üs do eifach wohl fühled und no e Woche blibed.

De Albert probiert ide Zwüscheziit no en frische Pulpo ufztriebe, wa do gar nöd so eifach isch...