Galapagos Inseln

Üs fählä langsam d'Wort um das ds beschribe wo mir dörfe gseh und erläbä... 

Mir hei churzfristig ä 5-tages Tour uf de Galapagos Insle buechet und si de a Bord vomnä coole Katamaran gstige. Ds Schoukle ufem Schiff isch zimlech gwöhnigsbedürftig gsi. Ir Nacht bi ig mir wie im Europapark uf dr Euro-Mir vorcho, ussert dasses nie ufghört het ☺🙃

Scho dr erscht Usflug a Land isch geniau gsi, mir si bi strömendem Rägä uf d'Suechi nach de Galapagos-Riseschiudchröt gange. Guet, so schwirig si die nid ds finge: Mitere Panzerlengi vo überemne Meter und amne Gwicht vo fasch 300kg, faue die schnäu mau uf 🐢

Üsi Route mitem Archipell 1, so het dä Kutter gheisse 🤣, het nis uf verschidnigi Insle bracht. Mit üsem Guide em Fernando hei mir de geng Usflüg uf die Inslene gmacht u die verschidnige Landschafte agluegt und Tierarte beobachtet. Bis itz hani nie so viu mit Vögu chönne afah. Aber mit däm rise Wüsse wo dr Fernando het gha, isch sogar das interessant worde. U mir hei nid weni vo dene Vögu gseh: Zum Bispiu ä luschtige Blaufuesstöupu, wo im Kreis tanzet oder dr Fregatte wo ihre rot Cheuchopf cha ufblase. 🦅

Spannend isches o im Wasser worde. Mir si entweder vom Land oder vo de Zodiacboot us ga schnorchle. Mir hei wunderschöni Ungerwasserlandschafte chönne gseh. X verschide farbigi Fische si umegschwume, ja fasch wie bim Sändu Deheim im Aquarium 😉 

D'Highlights Ungerwasser si de aber scho die grössere Tier gsi... Mir hei unzähligi Galapagos-Seelöiä a Land u im Wasser gseh. We d'Seelöiä guet gluunet si schwümme u spile si um di ume, wenn nid geisch nä gschider us wäg 🙈

Aus nächschts hei mir zwöi Galapagos-Pinguine gseh, mit viu Glück, da die leider vom usstärbä bedroht si... Äs si übrigens die einzige Pinguine wo ir Wiudnis nördlech vom Äquator adsträffä si 🐧

Was isch aus nächschts cho? Ah ja... Ä riisige Wasserschiudchrot isch unger mir düre gschwumme, mir hei nis agluegt u si änang wider us wäg. Das isch äs blibends Erläbnis gsi. Dä isch äuä äs viufachs vo mim Gwicht, aber schwümmt so gschmeidig u ruihg Ungerwasser mit sim grosse grüene Panzer, ungloublech 🐢

Verschideartigi Stachuroche hei mir am Meeresgrund und am Strand entdeckt. Teu nume ganz chli, angeri mitemne Meter im Durchmässer.

Nach paar "Touchgäng" hei mir de o dä Fisch entdeckt wo für d'Galapagos berüchtigt isch. Üs Beidne isch churzerhand dr Schnuuf usblibe u ds Härz isch id Hose gheit. Churz nachdäm mir vom Zodiac ids Wasser gumpet u los gschwumme si, gseh mir zwe grossi Weissspitzen-Riffhaie! Bhuu, was machsch itz? Eifach ruihg blibe u zueluege, isch nid ganz so eifach... aber lohnenswärt! Da si normalerwys nid aus gfährlech gäute hei si ds Interässä a üs de o mau verlore u si i de Feuse inne verschwunde 🦈

O ufem Archipell hei mir ä gueti Zyt chönne gniesse. Mir hei verschidnigi Ecuadorianischi Gricht u Cocktails kenne glehrt oder eifach ufem Sunnedeck d'Ussicht gnosse. Uf üsere Route hei mir d'Insle Santa Cruz, Floreana, Española und San Cristobal bsuecht. 

Wichtig isch no ds Wüsse, dass viu vo dene endemische Arte uf de Galapagos Insle gfährdet si. Ungerdesse isch ä Grossteu vo de Galapagos unger Schutz gsteut und d'Lüt uf die sensitivi Tier- u Pflanzewäut sensibiliert worde, damit das Paradies hoffentlech blibt bestah.

Mir chönnte äuä vo jedem Schnorchle und u jedere Insle no viu meh drüber schribe, aber das chöi mir de verzeue we mir zrügg si 😉