ranch life & kamloops, british columbia

bevorimi ufe läng wäg i norde mache, bsuechi no s'mimi (e super kollegin vo deheim) wo fürne monet ufere farm in little fort isch. si zeigtmer die schöni umgäbig, was si so macht und mir heis lustig wie eh und je. toll fründe am angere ändi vor wäut z'träffe und wöu die gmeinsami japanreis vor 3 johr nid klappet het, isches umso besser heimer üs jetzt do in kanada troffe. ih mire unschlüssigkeit woni düre söu richtig alaska, froge mi d'farmbsitzer obi nid am mimi ire nachfouger wet si wöu e angere häufer abgseit het. damers outofahre chli verleidet isch und allei d'tankchoste für ei wäg so vüu wäre wiene flug hi & zrugg, sägi ihne zue für 3 wuche häufe und bueche e flug für am 19. juni.

1h nördlech vo kamloops in little fort geitme mitere chline fähre übere north thompson river, dürne waud a chüeh verbi, es paar witere kurve ufere staubigi stross und nach 15min chundme zum rote gatter - hidden valley ranch. nid riesig für kanada, aber trotzdäm gnue gross asme allei isch undme cha mache wasme wott. si läbe nid vom farme, es isch meh es hobby und hei drum no jobs näbebi. ca. 40 chüeh, 5 ross, 6 hüng, 5 chatze und es dutzend hüehner. am meiste git aber natürlech dr garte z'tue, heisi doch zimli vüu gmües, beeri, frücht, chrüter und süschtigi pflanze. e normale tagesablouf vo mir gseht so us; 6.30 tagwach, früehstück, mit de hüng go d'gränze resp. zühn abloufe zum sicherstöue as niene tier ine oder use chöi, ross ufne angeri weid bringe, snacke, paar stung jätte oder süsch dr grüen dume aktiviere, lunch, zuhn repariere oder houz hacke (lieblingsbeschäftigung wöus es guets workout isch), im grosse rahme giesse und wenns um die 7-8i de z'müehsam wird mit de mugge gits langsam znacht. spezielleri sache wie s'brande vode chüeh, überzähligi hüehner chöpfe oder höie si e gärn gsehni abwächslig. 2 kuuli usflüg machemer und zwar einisch ane tierauktion und s'angere mou anes lokaus rodeo. beidi mou bini ohni cowboy stifle und huet zimli dr touri.

aues in auem isches e troumhafte ort (siehe fotis), kuuli lüt und e spannendi erfahrig. wöus aber immer was z'tue git und si vo sich us nie säge "jetzt isch guet" oder "mach was für di", chundme sech liecht usgnützt vor und het eich ke chance zum irgendwas süsch z'mache. 

somit bini froh hani es eigets outo und cha am wucheänd wäg richtig kamloops woni 3 mou es paar täg miter familie stone, uf vancouver island könneglert, verbringe. die si super sportlech und liebe aui outdoor akitvitäte. s'glück wott as d'tochter (ähnlechs auter und löiferin) düre summer deheim isch und mit ihre goni go sekle, kanue und standup paddle. dür das chani ou das vorzitige summerwätter chli gniesse, die letschte 3 wuche hets gschetzti 20min grägnet und d'temperature si fasch täglech um die 30° gsi.

jetzt bini aber ready für alaska und fröie mi unghür weni die zwe schlawiner in anchorage am flughafe atriffe. d'wg heidehubu isch wieder mou vereint - aiaiaiaiai :)