ohio -> south dakota & colorado

am morge woni rochester verloh schneerägelets, ouso somit dr richtig momänt zum witerzgo. s'schlächte wätter vo oste im rügge isches wiene flucht und drum fahri zimli vüu km. ohio, indiana, illinois und iowa si zum glück staate woni (nach mire meinig) nid mega vüu verpasse. e churze stop am lake michigan hani aber glich wöue mache, säge doch immer aui die "great lakes" si fasch chli wies meer und i hami säuber dervo wöue überzüge. wow tatsächlech, e strand, wäue und e wiiti wie amne ozean - okay uf dr einte site gseht me d'skyline vo chicago. landwirtschaft isch s'houptmerkmau uf dere 1'500km länge strecki und drum gsehni primär fäuder, traktore, chüeuh und die typische farme (siehe foto). in indiana hani e lustigi veränderig mit kutsche und pfärd, nur leider glingtmer keis büud vode amish people. aus abwächslig loufi in illinois dürnes härzigs chlises städtli names ottawa mit tolle grafitis. bi einisch meh beidruckt wie guet as die meiste raststätte si, suber, guet gstautet und in iowa sogar mit gratis wifi. south dakota isch sioux gebiet und entlang vode ehemalige prärie (die europäische iwanderer wo damaus land gschänkt becho hei, heis zu weideland umfunktioniert und ihghagt) gspüri mis indianerhärz wieder chli pöpperle. die vile plakat am rand vor stross nach weste si bekannt und ungerhautsam, wenn ou mängisch leider chli krass "redneck" amerikanisch wie zb. "eat meat, wear fur and keep your guns". amne tag wos wieder mou so richtig rägnet isch glücklecherwis champions league und i fahre in kadoka verbi wo e bar, bibliothek, lädeli und e schueu het. nachem match ir bar, machi paar bsorgige im lädeli und schribe mails ir biblio. dört quatschi mit paar iheimische und ohni dasi was cha iwände bini scho bi öperem deheim und gniesse es feins znacht. das nätte ehepäärli het immer fröid wensi öper vo nöime angers träffe und wüu si lehrerin isch, gibi am nöchste morge e vortrag über d'schwiz vor ching (4.&5. klass) wo die meiste vermuetlech (lut ihre) nie wärde us dr usa usego und niemer gwüsst het wo üses land uf dr wäutcharte isch. paar lustigi froge; was mir fürne dollar hei, obs lamborghini ir schwiz git, werum dass ig meh aus ei sproch rede & ob mir büecher läse. e härzige dicke bueb schänkt mer no eis vo sine cola fläschli, i gsech familiär us und är het no über 40 deheim. usgrüstet mit proviant wie hirschsalami, würstli und chili (natürlech aues säuber gmacht/gjagt) und nachere duschi bini wieder ungerwägs - bi scho e glückspüuz mängisch. im südweste vo south dakota gits äntlech wieder mou chli abwächslig ir landschaft. d'sicht übere badlands np, übrigens so benennt wüu im 18. johrhundert franz. trapper frustiert si gsi ir fortbewegig abem müehsame/schlächte land, mit de pinnacles isch sehenswärt. juhuu i bi zrüg ide bärge und kurve & päss si wieder in. mount rushmore liegt ufem wäg und mitere klassische tobi aktion chani das ganze ou gratis bestune. am dänkmou vom george washington, thomas jefferson, theodore roosevelt und abraham lincoln heisi vo 1927-41 gmeisslet und dr chopf wom george isch 30m höch. dr wind cave np isch us mire sicht nid sonderlech speziell, aber i bi hout ou fangs verwöhnt. die glorriche westernzite si i vüune chline bärgdörfli no guet sichtbar mit schüuder und hüser wo ad cowboys, goldschürfer und trapper erinnere. sattelmacher, hufschmied & pelzjäger si höch im kurs gsi.

colorado was fürne staat. mit kalifornie zäme dr tollst woni bis jetzt erläbt ha (gfougt vo utah), wüuer so vüu verschidnigs bietet. agfange im rocky mountain np wos chli wie deheim isch, eifach grösser und weniger bevöukeret. dr schnee wos vor wenige tage gäh het erloubtmer nid ganz aues z'mache woni wett, aber evt isch das sogar guet, süsch chönnti mi nid entscheide. nöch a denver bsuechi s "red rock amphitheatre", e kuuli outdoor arena bout zwüsche föuse wo am morge gnützt wird vo sportler und spöter am tag für konzärt. in colorado springs bsuechi dr "garden of the gods" und dr kontrast flasht mi zimli, die rote gestei mitem blau himmu und im hingergrund schneebärge. bi warme 23° chani sogar wieder mou chli sünnele, bevorimer de nach 4 täg (2 mou imne bärgfluss badet) äntlech es fitness-/swimtraining & e warmi duschi gönne. im great sand dunes np het d'natur die höchschte (229m) düne vo nordamerika erschaffe und wiederum mit de schneebärge hingedra isches absolut troumhaft und fasch chli surreal. s'ufehike und de abespringe/gheie/surfe dörf natürlech nid fähle. da a jedem tag räge oder sogar schnee für morn gmäudet isch, goni hout no meh südwestlech und chume am mesa verde np verbi. bekannt für d'ruine vode pueblo lüt wo vor 1'400 johr do heimisch si gsi und uf grund vore 23 jöhrige trocheheit de das gebiet verloh hei. sackstarch die hüser so ide föuse go boue ohni modärni hüufsmittu. triffe & ungerhaute mi zum erste mou siti ir usa bi mit schwizer, es sympathischs päärli wo d'wäut bereist, do lots eim schwach wärde. zäme mit ihne bini de ou teil vore churze & spannende tour. randnotiz, 70% vom park isch siter eröffnig 1906 betroffe gsi vomne wüudfür.

d'schönwätterverfougig het erfougrich funktioniert und i bi am weste es guets stück nöcher. fröiemi ufnes paar sache woni noni ha gmacht in utah und de bini evt scho baud wieder ar küste.

bi mir isch flip-flop, tanktop und sunnecreme agseit ouso i bi super glücklech :) hoffe bi öich besserets ou baud.. machets guet