new york - city & state

uf new york city inefahre isch wie erwartet dr horror und weni nid e iladig vo öperem hätt, hätti e grosse boge drum gmacht. in massapequa, long island bsuechi d'middletons wo letscht juli gest im b&b si gsi. scho uf vancouver island hanimi super mit ihne verstange und drum simer ständig in kontakt blibe. mitem simon machi sportlechi aktivitäte, d'kristin verwöhnt mi aus wäri imne 5 stärne hotel und zäme heimer lustigi öbe, ässe vorzüglechi dinner und luege füume. ei morge bini mitem simon nach manhattan pändlet und do mis persönleche feedback: zu mim erstune isches e stadt wome gäbig z'fuess cha erkunde (weme d'km nid schöit) und weme glück het mitem wätter umso besser. times square isch idrücklech z'gseh mit au dene wärbige und liechter, aber jo flashed mi wie erwartet nid wük. d'high line, e erhöhti fuessgängerpassage, bietet gueti sicht uf d'strosse und isch schön im früehlig mit de verschidnige böim & pflanze. um die nöie world trade center isch 9/11 omnipresänt und generell isch scho sehr fest z'spüre wie das tragische ereignis amerika prägt het. weme bedänkt as s'militär lang (vor auem währendem vietnam chrieg) eher unbeliebt isch gsi und när de sitem 2001 vor mehrheit verehrt wird. dürne bekanntschaft chani dr blick usem wtc one, aktuell s'höchste gebäude ir usa mit 1'776feet (independence day) oder 541m, gratis gniesse und wie immer gseht vo obe aues no chli spektakulärer us - chunnt uf de fotis nid so zur gäutig. dr charging bull ar wall street isch chuum sichtbar wöus so vüu touris het. e guete blick uf d'statue of liberty bechumi uf dr fähre (ohni koste) und weme vo brooklyn här über d'brügg louft gniesst me e vorzüglechi skyline. museen hätts definitiv ou no s'einte oder angere, aber hani leider a däm tag kei zit meh. ouso sicherlech e kuuli stadt, aber weme sech nid so vüu us kunst, shopping und restis/bars macht, wedi nid nid meh aus 2-3 täg do verbringe. drum isches de am nöchste tag anstatt e ernöiti zugfahrt e velotour. long island isch riesig und so machi locker 70km bi sensationellem wätter, wobi die prächtige awäse toll zur gäutig chömme. die 3 täg wo nid so rosig si zum dusse was z'ungernäh, trenieri, wäsche mis outo und bi froh imne hus z'si. bevori am ostersundi nomou so richtig d'gsöuschaft mit ihne gniesse, sprinti imne hüglige 8km louf ufe 3. rang (äntlech hani ou ider usa no amne offizielle louf teilgno). 2 täg heimer üs vorhär könnt und nach chli meh asere wuche füeuhtsechs ah, aus würise scho ewigs könne. unäntlech dankbar für iri gastfründlechkeit & gueti art, verabschidimi schweren herzens und unger protest vo ihre - i söu doch no chli blibe.

eich wäri gärn uf maine ufe, aber meteo gseht zimli schlächt us und drum geits richtig nordweste. kurz vor dr kanadische gränze verwili 4 täg in brockport, rochester womer fründe vo mexico iblick is studänteläbe gäbe. d'sunne meints guet mitmer bim tagesusflug zude niagara falls. scho beidruckend was do fürne wassermasse fliesst. unglücklecherwis isch dr best ussichtspunkt gschlosse uf grund vor wintersaison - was uf dr angere site wenigstens weni lüt zur foug het. rund um rochester zeigesimer iri paar lieblingsorte und mir hei lustigi öbe mitnang. am morge vo mim ufbruch schneielets...

und somit tritti jetzt quasi mi rückwäg i weste ah. no 3,5 wuche isch mis us-visa güutig. woni genau düre go weissi noni und wirdi abhängig mache vom wätter. im nöchste blog gits meh derzue. fröiet nech, dr lunisch april neigt sech am ändi zue und mai stoht vor dr türe :)