Day 10 - Yves 3.0

23.11.16

Höt mol en Brecht of Buredütsch, sorry für unsere Freunde aus dem Norden:-)

Ufstoh om 07:15, es werd jo schliesslech scho am haubi sechsi hell. Höt esch en spezielle Tag, de "Yves 3.0 Tag". De Marco hed zo minere Öberraschig üse Jucy Ju dekoriert ond zom "Happy Mobil" gstaltet.

Z'morge gehts be strahlendem Sonneschien a üsem coole Öbernachtisplätzli. De Marco werd zwar vo e par Möve gstört, aber sösch gniesse mers z'Zorge - bi dere tolle Landschaft.

Üsi Wösch esch noni ganz troche, drom dömer si em Auto witertröchne...

Los ghots ade Köschte entlag Rechtig Whangarei, teils öber Schotterstrosse (sog. Chees-Strosse), teils ofem Highway 1, öber steili Bergstrosse sowie am Meer entlang. Üse Saftwage (Jucy Car) esch zemli gforderet, wels weder ständig "ambri ond ambrüf" god. Am Langs Beach möche mer denn die erst Pause, es Steiboccia ond en Fahrerwechsel - es esch weder sehr sonnig ond warm (ca. 27°). Gern wörde mer a dem tolle Strand länger bliebe, jedoch mömer witer.

En Whangarei gehts nomol en Ichauf för die nöchste Täg ond en Mettagshalt - naja es esch zwar scho vieri.

Witer ghots öber Whakapara ond Kawakaka noch Paihia. Det gömmer ofe Campingplatz, ned ganz so idylisch wie geschter ond ned gratis, aber au en tolle Fläck. Es esch bereits viertel vor sebni, wo mer achömid. De Marco bereitet üses z'Nacht vor. Luegid selber, was es zom Porzeltag ged...

Währendem Z'nacht esch es bereits am idonkle, deför werde mer weder vomne tolle Sternehimmel entschädig - eifach onglaublech, das chömer üch leider ned zeige of de Belder, das mönd er selber cho aluge :-)

So en idröckleche ond erlebnisriche Gebortstag hani no nie gha, do werd mer gern es Johrzent älter. Jetzt hani doch 30. Johr mösse warte, zom em Sommer - be 27° - Gebortstag z'ha:-)

Ech danke üch für euchi Glöckwönsch.

PS: mer dankid förs vele läse onds kommentiere.