Trinidad

Mir sind früeh am Morge abgholt worde. Trinidad isch eini vo de grössere Städt in Kuba. Mir hend nur gwüsst, dass d Stadt schön isch, en traumhafte Strand het und guete Usgang.

Mir sind in Trinidad acho und sind durch die enge Gässli dure gfahre. Alles Pflasterstei, es het eus halbe s Hirn use gschüttlet mit dem alte Klapf. 

Mir sind denn ine relativ grossi Casa cho. D Muetter det het eus begrüesst zeme mit ihrere "Tochter". Mir hend e steili Stäge ue müesse und die "Tochter" seit zu mir "Gib de Rucksack, ich nimm en". Denn het sie mir de us de Händ grisse und isch die Stäge ue gsecklet. Es isch eus denn schnell klar gsi, die Rebecca isch nid scho immer e Tochter gsi, sondern mal ihren Sohn. Wo ich ihre denn aber us Astand 3 Küssli geh han bin ich nacher de König gsi det ine. Uf de Terasse hend mir hammer Ussicht gha und hend au na jungi Dütschi kenne glernt wo au döt übernachtet hend, mir hends echt lustig gha. 

Am Namittag sind mir biz d Stadt go aluege und was chlises go Esse. Die Hüser sind relativ lustig baue. Grossi Balkontüre wod eigentlich direkt id Stube gsesch. Am Abig machet denn alli d Türene und Fenster uf und me gseht bi allne id Hütte ie. Wo mir denn bim einte Hus duregloffe sind hend mir 2-3 Katze gseh und d Muriel isch stoh blibe und het "jöööö" gseit. Die wo det gwohnt het, het das mega lustig gfunde und het d Türe ufgmacht und mir sind ihre id Stube ie gloffe und hend biz die Tierli gstreichlet für 30 Minute. Das hend mir denn uf em Heiweg na 2-3 mal gmacht. 

Am nöchste Morge het eus dRebecca de z Morge uftischet, mir natürlich mit extra viel Grinse und Liebi..... A dem Tag sind mir früeh an Strand gange. Es isch aber relativ touristisch gsi. Ganz viel Hotels und halt dementsprechend viel Liegestüehl. Mir hend denn au eifach so en Liegestuehl gno und hends eus bequem gmacht. 

Me glaubts chum aber ufsmol ghör ich i mim linke Ohr e bekannti Stimm. Das Schwizer Päärli wo mir im Taxi kenne glernt hend, het sich genau au det es Plätzli gsuecht und sind genau neb eus ane glege. Ich han denn "Hoi zemme" gseit und sie sind glich verblüfft gsi wie mir au. Denn hend all agfange lache und mir hend wieder agfange schnorre. Biz spöter bin ich no uf e Schnorchel Tour. Mit em Böötli sind mir biz use gfahre und hend 1 h 30 Minute chöne Schnorchle. Nur blöd het d GoPro Kamera de Geist ufgeh. Das isch nämlich eine vo de schönschte Ort gsi zum schnorchle, wo ich je gseh han. Unglaublich klar und 1000 Farbe und Fisch. Aber au ganz viel Quallene. Um die ume het me lieber biz en Slalom gmacht. D Rückfahrt id Stadt isch denn au no so es Gschichtli für sich gsi. Mir hend die offizielle Taxis nach em Pris gfroget. De isch aber so unverschämt tüür gsi, dass mer da nid hend welle ahneh. Biz absiits vo de Strass isch en Typ ah sim Auto glehnt und het eus zuezwinkeret. Nach eme churze Gspröch hett eus de denn für en drittel vom Priis zrug id Stadt gfahre :). 

Die nächste Täg hend mir mehrheitlich chli Gläse, sind im Städtli ume gschländeret, hend Cuba Bars mit Rum und Mojito gnosse und mit de Lüt gredet. Ganz e bsunderigi Stimmig gsi in Trinidad.

Als nächsts sind mir uf Varadero, de letzti Stop vor Havanna.

Next Stop: Varadero