Reykjavik 1.6.19

Samschtig 06:15, Wecker lütet.
Wetterbricht isch geschter nid so toll gsi für hüt. Also zieht de Roger scho mol langi Unterhose mit dicke Söcke ah.
Churz zmörgele und denn gohts au scho uf de Golden Circle!

Und goldig isch es gsi. Kei Wölchli, blaue Himmel und Sunneschiin die ganzi Tour! (toll mit de lange Unterhose...).
Über guet beschilderti und usbauti Wege sin mir cho. Immer wieder ahghalte für Föteli, sigs vo de Landschaft, aber au vo de Tier.

De erschti richtigi Stop isch denn de Geysir gsi. Und de heisst au grad so. De spuckt aber nur alli paar Stund was us, viel interessanter isch nebedra de Strokkur.
De spuckt alli paar Minute, mol mehr mol weniger hoch.
Sehr interessant so öbbis, au rundum s'Areal mit andere brodelnde Löcher und chline Wasserläuf wo über 80Grad hen.
Und es stinkt bitz nach fuule Eier.

Nöchschti halt isch denn de Gullfoss Wasserfall gsi.
Sehr imposant wie er über 2 Stuefe in d'Tiefi stürzt. Im Hintergrund Schneeberge, blaue Himmel une klars Wasser, perfekt!

De Kerio Krater isch äh wiitere Stop wärt gsi (übrigends s'einzig wo ca. 5 Stutz iitritt koschtet het).
Die ganzi Insle isch eigentlich äh Krater Landschaft wo überall Felsbröcke liege. De Kerio isch eher ä kleine aber sehr schön gformte Krater so dass me de au no erkennt.

So langsame wirds m denn Ziit zum zrugg fahre. Churz no Zmittag kauft und an eim vo de unzählige, schöne Picnicplätz gesse.

Vor em Schiff denn die letzschte Isländische Krone in Souvenirs investiert.
Ufm Schiff denn zrugg, kaputt aber happy. Und zobe wartet als s'einzigs no Champions Leaque Final!

Morn isch denn wieder Seetag um richtig Schottland z'cho.