04.06.2019 Newhaven (Edinburgh), Schottland / Grossbritannien

De halt in Schottland muess aber klappe! S'Wetter spielt au absolut mit. 

Da Edinburgh über kei Krüzfahrthafe verfüegt, ankeret s'Schiff ufm Meer und me tenderet. Da es noni so ganz klar gsi isch wenn unser Tender ready isch, sin mir rechtziitig ufgstande, und hen sogar z'morge ufs Zimmer lo cho. 

De Weg mitm Tender isch aber recht lang, fascht 30min ei Weg, und nur 8 Tender dörfe fahre (6vom Schiff, 2 vom Hafe). Das het alles ä bitz verzögeret. Gege die 11i isch es aber losgange, mit Glück hen mir so e Hafe Tender becho. Somit sogar Sunnedeck, Dudelsackmusik und paar Infos. 

Denn no mitm Bus in d'Innestadt (mir sin eigentlich in Leith glande) und scho sin mir im Gwüehl gsi. Nümm so ruhig wie in Island. Viel Mensche, aber au ä iidrücklichi Stadt mit tolle Baute und Gschicht. Über allem d'Burg wo über d'Stadt trohnt, überall Fotimotiv, me weiss nid wo luege. Mir sin erscht mol z'Fuess über "royal Mile" gloffe und bitz gschlenderet. 

 Imene Pub hen mir denn mol ghalte, nid für Bier, aber für Fish and Chips und Bangers and Mash. Absolut tolli Atmosphäre, super Esse zu tolle Priise. De Stop het sich absolut glohnt. Nachher hen mir uns entschiede no mitm Bus Edinburgh z'erkunde, isch doch sehr gross und hügelig (isch uf siebe Hügel baut). 

So hen mir ohni gross Muskelkater doch ä grosse Teil vo de Hauptstadt Schottlands gseh. Ahschliessend die obligate Souvenir gschneugt, und denn wieder richtig Schiff. 

 Erscht vor em zrugg tendere hets britische Wetter iigsetzt und mir sin bitz nass worde. Da es diesmol aber ä Tender vom Schiff gsi isch, hen mir eh müesse dine sitze. Jetzt sin mir K.O. morn gits denn nomol ä Seetag, bevor denn am Donnschtig s'letzschte Kapitel vo dere Expedition chunt - Kopenhagen.