30.06.2019

noch de 10 stöndige busfahrt send mer am morge früeh in chiang mai ahcho ond hend eus as ersts uf d‘suechi noch emene guesthouse gmacht. ih dere grosse stadt, wo de chärn old city heisst, esch das keis problem gsi do s’ganz vell guesthouses ond onterkönft hed. mer send zerst chorz nochli go änelegge well mer beidi ned so guet hend chönne schlofe im bus enne. nochäne hemmer d’möglechkeit gha diräkt bi eusem guesthouse en roller z’miete. das hend mer notürlech sofort gmacht ond send ahschliessend losdüset zom go d’stadt entdecke. am ahfang eschs chli en omstellig gsi well in thailand esch lengsverchehr ond vortrett hed meistens eifach dä, wo zerst fahrt. es esch en wonderschöni stadt ond im gägesatz zo bangkok vell weniger hektisch. es hed aber alles zemlech ähndlech usgseh dank em navi ufem handy hemmer aber de heiwäg no emmer gfonde. am nomitag semmer chli usem zentrum vo chiang mai usegfahre ond hend eus uf de wäg zomene wasserfall „montha than waterfall“ gmacht. wo mer weder zrogg gsi send semmer im guesthouse no go bädele imene chline jacuzzi. spöter send mer den no ah saturday market gange.

höt send mer weder die glichi strecki gfahre send jedoch nochem wasserfall no witer ih die rechtig gange. ufem wäg esch en riesige tempel „wat phra that doi suthep“ gsi met emene ussechtsponkt wo mer uf chiang mai abegseh hed. nochdem mer de tempel ahgluegt hend semmer ines chlises dörfli „don pui“ gange wo ganz im bärg obe esch ond nomol öbbe en stond entfärnt gsi esch. in don pui heds en wonderschöne park gha ond es hed en hufe schöni föteli gäh. am obe wo mer weder zrogg in chiang mai gsi send semmer ih night bazar gange wo rächt vell los gsi esch ond am schloss send mer is hard rock cafe gange wo live music gsi escho nd mer en mega coole obe gha. för morn hend mer en fahrt met emene minibus noch pai buecht. d’fahrt gohd öbbe 3 stond ond mer wärdid morn am mettag in pai ahcho.