28.06.2019

mer send deheime am mäntig obe in zöri abgfloge ond send noch emene zwöschehalt in dubai am zistig obe am 7i in bangkok ahcho. es hed alles tip top klappet gha ond die zwöi flög send beidi sehr schnell verbi gange. noch dem mer in bangkok öbbe en stond hend müesse ahstoh ade passkontrolle bis mer euses visum öbercho hend, hend mer eus ufe wäg is hotel gmacht. euses hotel esch zemli im zentrom enne ond mer hend die legste 3 nächt im 17. stock döffe öbernachte. 

ide legste zwöi täg hend mer sehr vell erläbt ond en hufe spannendi ihdröck döffe sammle. am erste tag send mer id khaosan road gange. das esch sehr en bekannti stross in bangkok met en hufe restaurants oder bare. dete hend mer au eusi ersti thai-massage öbercho. nochäne semmer met emene boot en rondfahrt ufem chao phraya floss go mache. gändet hed die fahrt ufere wonderschöne tempelahlag wo mer spöter imene chline härzige restaurant send go ässe. am obe send mer nochli ih usgang gange ond hend en chline abstächer is soi cowboy gmacht.

gester send mer metem skytrain chli usem zentrum gfahre noch hua mak. vo dete us hend mer es taxi gnoh bis zom airport graveyard. das esch en flogzüg fredhof ond do dä rächt abgläge ond  ned sehr bekannt esch, send mer ganz eleige uf de riesige ahlag gsi. es esch sehr spannend gsi ih die alte ond verlassnige flogzüg ine z'goh. de röckwäg hend mer eus definitiv eifacher vorgstellt gha, well es hed eus nämlech keis einzigs taxi welle metnäh. auso semmer öbbe en stond dör iheimischi gebiet rechtig bahnhof gloffe. mer hend scho angst gha das gar keis tax meh chond. dor das dases am mettag för ca. 15 minute rächt heftig grägnet hed send es bar strosse öberschwemmt gsi ond mer hed gar ned öberall chönne dörelaufe. schlossändlech hed den doch no es taxi ahghalte ond mer send weder am bahnhof ahcho wo mer de metem zog weder zrogg is hotel send. ahschliessend semmer no ine skybar wo rächt nöch vo eusem hotel gsi esch. de usbleck esch eifach onglaublech schön gsi.

höt  hemmer no de legsti tag in bangkok vor eus bevors den höt obe metem nachtbus witer uf chiang mai ih norde vo thailand gohd.

dave & meli