24.07.2019

noch koh tao semmer zerst no 2 täg uf khanom gange. das esch ganz es chlises dörfli ade ostküste wo mer imene guesthouse vomene schwizer gsi send. nochäne semmer metem minibüssli uf surat thani ond vo dete us witer ih nationalpark in khao sok. am erste obe semmer uf en monkeyfarm gange wos ganz en hufe äffli gha hed. am nächste tag hemmer öbbis mega speziells gmacht. mer send met emene elefant zäme go bade. es esch för eus beidi s’erstmol gsi das mer en elefant so nöch vor eus gha hend. es esch en mega zahme elefant gsi ond met de zit hend mer ehn au problemlos trouet ahzlänge, z’wäsche met de börste ond spöter no met banane z’füettere. am spötere nomitag semmer no met zwöi gommireife en floss derab. mer hend notürlech weder en roller gmietet gha ond drom semmer am druf folgende tag es usflögli goh mache. mer hend ca. öbbe för ei wäg 1.5 stond müesse fahre bis mer uf de andere site vom nationalpark gsi send. dete semmer bimene see ahcho ond send de ganz tag met emene böötli onterwägs gsi ond hend en wonderschöni landschaft gseh.