11.07.2019

koh phangan esch wonderschön gsi! mer hend jo vor gha das mer vo chiang mai abeflügid uf surat thani ond vo dete us ah hafe fahrid ond den diräkt en fähri nähmid uf koh phangan. well mer aber erst am 5i glandet send esch om die zit leider kei fähri meh gfahre. drom hend mer eus entschede, das mer met de nachtfähri uf d'ensle usegöhnd. de obe hend mer am hafe verbrocht bis mer den am 11i uf d'fähri send. gschlofe hend mer beidi ned eso vell well mer send bereits am morge am 6i ahcho ond es esch sehr heiss gsi wells kei air condition gha hed - trotz allem eschs en cooli erfahrig gsi ond mer hend eus en öbernachtig chönne spare.

am hafe ahcho hend mer es taxi gnoh wo eus ih norde ufe gfahre hed. wo mer dete ahcho send, hend mer aber müesse feststelle, das mer eigendlech ane andere strand hend welle ond mer am falsche ort glandet send. es esch no rächt usgstorbe gsi wells no so früeh am morge gsi esch. nochäne hed eus den aber en iheimischi gholfe ond gseid das mer met emene böötli ah de ander strand chömid. das hemmer den au eso gmacht. nochere lange ahsträngende reis send mer den ändlech ah eusem gwönschte ziel ahcho. mer send wortwörtlech im paradies glandet gsi. mer beidi hend nonie ih eusem läbe soo en schöne strand gseh wie dä ade bottle beach. de strand esch nome knapp 500 meter lang gsi ond es send vier guesthouses / hotels ade bottle beach gsi. es esch ganz en einsame strand gsi ond de perfekti ort gsi zom d'seele chli loh baumle ond eifach die wonderschöni zit zäme z'gniesse. mer send go schnorchle, hend en hufe gässe ond d'meli hed zit gha zom ehres buech afo läse wo sie scho set ahfang vode reis met sech omeschleppt. de dave hed met sinere drohne onglaublech schöni belder chönne mache.

noch 3 täg erholig ond abseits vom nachtläbe ond andere mönsche hend mer beschlosse, das mer no ih süde abe vode ensle wend, wo chli meh lauft. mer hend es schöns hotel met emene zemmer diräkt am strand gfonde. ah dem tag wo mer ahcho send, esch s'grosse halfmoonfestival, wo zwöi mol im monet esch, gsi. do mer gnau zuefällig denne dete gsi send hend mer eus die chance notürlech ned welle loh entgoh ond hend en ossergwöhnlechi party döffe erläbe. es anders highlight in koh phangan esch secher au slip'n'fly gsi. mer send ufere ahlag gsi wo zwöi riesigi rutschene gsi send wo mer mega höch id loft ufegschleuderet worde send. das esch au sehr es cools erläbnis gsi wo mer secher nie meh wärdid vergässe.

de text esch ide vergangeheit gschrebe, well mer momentan scho weder witergreist send nämlech uf d'nochbersensle vo koh phangan uf koh tao. do dezue folgt au gli weder es update.

dave & meli