04.07.2019

mer send mettlerwili scho de vierti tag in pai. ursprönglech hend mer nome chorz das chline dörfli welle go ahluege aber mer hend scho zwöi mol om en nacht verlängeret wells eus do eifach so guet gfallt. es esch en mega chilligi atmosphäre do ond es send alli mega guet droffe. dör das das momentan ned hochsaison esch heds ned so en hufe lüt was mer eigendlech grad no guet fendid. mer hend au weder mega schnell en neui onterkonft gfonde. mer send imene chline resort glandet met emene pool ond riesige schöne zemmer. mer send quasi eleige do uf dere ahlag mer hend noni vell anderi toureste gseh.

mer hend ide legste täg in pai sehr vell onternoh. onter anderem hend mer weder en roller gmietet ond send go d’ortschaft erchonde. do in pai heds en riesige canyon wo mer send go ahluege. es esch rächt abentürlech gsi uf em canyon ome z’laufe bzw. ome z’chlättere aber es esch en eimoligi erfahrig gsi ond mer hend weder mega schöni föteli chönne mache ond hend en atemberaubendi ussecht id landschaft vo pai gha. den semmer au einisch en versteckte wasserfall „pam bok waterfall“ goh ahluege wo mer zerst en halb stond hend müesse de bärg ufe wandere au das esch en mega cooli sach gsi. bim white budda semmer au gsi wo mer en herrlechi ussecht gha hend. s’highlight vo pai esch glaub de usflog noch lod cave gsi. das esch en riesigi höhli gsi wo mer en einehalb stond langi füehrig gha hend. es esch schwerig in wort z’fasse well mer sech das fast ned chan vorstelle wenn mer ned selber dete gsi esch. wenn öbber vo euch mol in pai esch wördi ombidengt det änegoh. es hed eus beidi mega omghaue. speziell esch no dases rächt abseits vo pai esch mer hend zerst metem roller einehalb stond müesse det änefahre. es esch aber en mega schöni strecki öber en pass ine gsi ond d’zit esch mega schnell vergange wells so hufe z’gseh gäh hed. äne esch d’meli gfahre ond bim zrogg goh esch de dave am stür gsässe.

höt send mer no de legsti tag in pai. för höt hend mer ned es grosses programm. mer leggid grad am pool (wo mer ganz eleige send) send nochli am blog schribe ond eifach mol am nüd mache ond chli fuulänze ond bädele. mer göhnd den spöter secher no öbbis feins go ässe ond am obe nochli ih usgang. es lauft jede obe öbbis in pai. am obe heds au ide einte stross emmer ganz vell streetfood wäge wo frösches ässe ond trenke ahbietid. vellecht gömmer höt no en andere wasserfall goh ahluege wo mer chönd go bade aber das entscheidid mer de spontan. morn werds en stränge tag drom dued die erholig höt secher guet. zerst fahrid mer metem büssli weder zrogg uf chiang mai vo dete gohds ah floghafe ond den flügid mer ih süde abe uf surat thani. den send mer äändlech am meer mer freuid eus sehr! bevor mer den aber am ziel send müend mer no ongföhr 3 stond met de fähre uf d’ensle koh phangan fahre.

mer wönschid euch ide schwiz en wonderschöne sommer vode temperature här esches glaub zemli öbbe glichig wie bi eus.

dave & meli