Reine, Nusfjord, Vikbeach-Haucklandstranda, Henningsvaer

1. Stop Reine

Bi Nieselräge hämmer en Kaffi und en Chailatte vorem Berg Reine gnosse. Isch echt fein gsi und es mega herzigs Kaffi womer au het chöne zmörgele. Alli sind so fründlich und offe, jede begegnet eim mitme Lächle im Gsicht. Do hemmer aber scho gmerkt, dasses biz meh Touriste het. Bis ez simmer dene echt devo cho🤭

2. Stop Nusfjord

Nusfjord stoht überall drin als es ‚to do‘ und ‚must see‘. Es isch scho herzig, aber totaaaal überloffe. Sie verlanget Ihtritt damit mr biz tüüfer is Dörfli gaht, sus chamers nur vo obe betrachte was mr denn au gmacht hend. Parke  isch d Höll gsi🤣 a de Siite vonre seehr enge Stross mitm rise Camper🙊naja, für 15min isches gange🤭

3. Stop Hauckland Beach

Mir hend gmeint mir sind da, sehr ruhig, wunderschön. Mir hends mega gnosse! D Hünd au. Denn hemmer gmerkt, dass mr am Vikbeach sind und s eigentliche Ziel ums Eck wär. Damit mr denn au na det gsi sind, simmer go luege-aber nöd usgstige, will oh mein Gott! So vill Mensche. De anschinend absolute Place to be…🙄ja mir sind nöd so. Das romantische, ruhige het eus vollkomme glanget.

Über en schottrigi, kiesligi Nebestrass simmer in Richtig Henningsvaer gfahre. Das sind wohl die Abkürzige in Norwege🤯ja d Cola oder Bierdose und de Prosecco würi ez gad für en Moment nöd ufmache🙊

4. Stop Henningsvaer

YOU GOT MY HEART🥹♥️d Lexi het sich grad verliebt, das süesse, chline Fischerdörfli mitme chline, gmüetliche Dorfkern hets ihre ab de erste Sekunde ahdue. Stunde hätti sie chöne do verwiile, öpis trinke und de Lüüt bim schlendere zueluege. Am letschte Teil vo dem Dörfli, ufre eigete chline Insle hets en Fuessballplatz🤔

5. Stop Ørsvågvaer

En riiiiiisige Campingplatz. Mega schöni Ihrichtig ide Rezeption. Sehr wiitläufig und me het sini Rueh. 

Womer au ane luegt gihts überall die Holzgstell. Früehner het mr die gfangene Kabeljau (Dorsch) det ufghänkt und trocknet ohni dass mr sie het müesse salze zum konserviere. Am Ahfang schmöckts rundume sehr nach Pathologie, d Bewohner säget, nachre gwüsse Ziit schmöchts aber nach Früehlig. Naja… weiss ja nöd🤔lömer mal so stoh.