Trondheim 2.0

Wills so schön gsi isch hemmer namal bim Thomas in Trondheim übernachtet, die Ussicht und die Gastfründlichkeit werde mr immer im Herze bhalte🥰hüt hemmer au na sini Frau kenne glernt. Au unglaublich sympathisch.

Am Abig wos biz chüeler worde isch simmer no as Meer mit de Hünd. Nudelfertig sind sie gsi. Mir aber au!

Am nögste Morge simmer früeh ufgstande, um na biz öpis vode Stadt zgseh bevors richtig heiss wird.

Ersti Besichtigung: Festung Kristiansten. Östlich vode Stadt liht die historischi Festig. Sie isch nachme grosse Stadtbrand 1681 baut worde zum d Stadt vor Ahgriff usem Oste z schütze. Ide Verteidigung vo Trondheim het sie e wichtigi Rolle, bsunders im Jahr 1718, wo sie d Stadt vor de Schwede het müsse. Sie isch nachm Dänisch-Norwegische König Christian V. benannt.

Zweiti Besichtigung: Old Town Bridge.

Dritti Besichtigung: Nidarosdom. RICHTIG ÜBERWÄLTIGT, vo dene krasse Details. D Stadt Trondheim het vorher Nidaros gheisse. De Dom ghört zude bedütendste Kirche in Norwege und gilt als Nationalheiligtum. Sit 1152 ischer d Kathedrale vode norwegische Metropolitan. Im Mittelalter und vo 1818 bis 1906 ischer Krönigsstätt gsi vode norwegische Könige. Es sind 7 König det krönt worde und 10 begrabe. Er isch 1090 ahgfange baue worde.

Denn simmer kurz ines Cafi, hend eus erfrüscht und sind denn wiider i euse Camper wo jetz Frederiks heisst😂 scho biz lang gange bis mr sie tauft hend🙊

Hüt 2 Fähre wiiter simmer scho wider ame chline herzige Camping. Morn gahts Richtig Oslo für ei Nacht damit mr wiiter uf Stockholm chönd🤩