...wow - scho esch en Monet vo minere Reis verbii! D Ziit vergaht so schnell da, wenn das amig nume bim schaffe au so xii wär ;-) Ich hanen perfekte Start mit schönem (heissem!) Wetter, enere nette Gastfamilie (leider hüt komplett vergesse es Foti zmache am Morge 🙈) feinem Esse, guete Lehrer ond super Lüt gha! Kes Wunder, göhnd sovel Lüt weder zrugg nach Sámara :-) da no es paar Idrück vo mine letzte 4 Woche: Stierkampf Nicoya Das traditionelle Fest in Nicoya (die nächst grösser Stadt vo Sámara us, mitem Bus ca. 1h) findet jährlich statt ond zieht Mensche vo überall her ah. Es het verschiednigi Essens- ond Kleiderständ, Achterbahne ond de traditionelli Stierkampf. Eigentlich bin ich ned so Fan vo so Sache, aber ich han denkt, ich söt mal chli öpis kulturells mache ond schliesslich ghört das da dezue. Die Tradition chunt vo Spanie, aber da tüends zum Glück d Stier weder verletze no töte, sondern sie riited eifach uf ihne, solang wies gaht bzw. bis sie abegheied. Denn hets immer mega vel jungi Lüt (hauptsächlich betrunkeni Type, wo sich müend bewiese ;-)) ide Arena, wo mit rote Flaggene ond farbige T-Shirts uf de Stier zuerenned, zum ihn nervös ond aggressiv mache. Eigentlich chrank, aber was Mensche ned alles zur Unterhaltig mached ;-) ich müessts jetzt ned namal luege. Horse Riding Playa Barrigona Was mer hingege viiiel besser gfalle het, esch s Riite uf Rössli xii :-) ich bin fast jedi Woche go usritte ond han mini Passion weder entdeckt. Für mich gits nüt schöners (okay, fast nüt ;-)) als am Strand zgaloppiere! Pure Freedom! 🤗 Whale Watching Eimal hemer en Usflug ufem Boot gmacht zum go Delfine ond Wal beobachte. Mer hend mega Glück gha ond grad scho bim usefahre en chline Schwarm ah Delfine entdeckt 🐬 es sind öpe 4-5 Stuck xii ond mer hend ihne recht lang chöne zueluege. Fotografiere ond filme hingege esch recht schwierig xii, wel sie eifach schneller unterwegs sind als d Kamera nachechunt. Echli wiiter hinte hemer denn au no en Buckelwal miteme Baby xeh. 🐋 Nachher simer no zumene Riff gfahre ond hend det chöne schnorchle, aber det hemer ned mega vel xeh, wel das Riff leider dur Abwasserverschmutzig vo sonere Firma det ide letzte 10 Jahr recht glitte het. FruteriaKochkurs D Schuel het jewils 1-2x pro Woche en Kochkurs verastaltet, womer au het chöne gratis teilneh. Da zeigt ois d „Mamá Tica“ grad, wiemer Empanadas mit Platanos ond Frijoles macht. Yummy 😋 Playa Peladas Nosara
A mim letzte Tag in Sámara (gester:-)) hemer Quads gmietet ond sind mit dene ah verschiednigi Stränd ade Pazifikküste gfahre. Es het mega Spass gmacht, aber am Schluss simer voll Staub xii, wel s meiste “Naturstrasse” xii sind:-)
TamagringosLas locas
Was mini Ziit in Sámara aber erst recht perfekt gmacht het, sind die Chicas ufem Bild. Muchas gracias ad Luana, Nina, Mishi & Sarina für alli betrunkne Nächt, sinnlose ond sinnvolle Gspröch, für oiches Lache & oichi Gsellschaft 💖 nos vemos pronto irgendwo uf dem Kontinent (dich ja zum Glück scho inere Woche weder, Sarina 🤗).
...but all good things come to an end! Ond so bin ich hüt mitem Bus (6h Fahrt mit 3x umstiege, ah das mueni mich no gwöhne 😅) wiiter nach Nicaragua greist. D Immigration esch recht speziell xii (zum Glück bin ich vorgwarnt worde), es brucht seeehr viel Ziit, mer muen ah 3 verschiednige Schalter verbii gah (zerst zum irgendwelchi Taxe á 8$ z zahle, denn zum us Costa Rica usreise ond am Schluss zum in Nicaragua ireise für 13$ ond dezwüsched muemer eifach sosch na öpe 5x de Pass zeige), es streuned einigi komischi Lüt ume, wo die ganz Ziit wend Geld wechsle ond pro Schalter staht mer öpe e Halbstund bis zunere Stund i brüetender Mittagssonne ah. Uf jede Fall bin ich recht froh xii, won ich denn endlich dur die Immigration durecho bin, bis ich gmerkt han, dass de gueti Señor am Schalter vergesse het, mer de Ireise-Stempel in Pass zdrucke 🙈 s ganze Spieli am Schalter Nr. 3 namal vo vorne - juhui.
ABER - ond das esch s Wichtigste - ich bin safe acho bi minere Gastfamilie in Nicaragua ond morn Namitag gaht scho d Schuel los. Wennis richtig verstande han, hani da Einzelunterricht ond chan hoffentlich echli vom spanisch profitiere. Im Moment brummt min Chopf nämlich voller Spanisch-Grammatik ond warted nume druf, bis sie chan agwendet werde 🤓.
San Juan del Sur - Nicaragua De wunderschön Sonneuntergang hüt z Abig het de ganz astrengendi Tag vergesse lah ond jetzt froi mich nume no ufs Bett. Was au schön esch, esch das ich mich vo Costa Rica nanig han müesse ganz verabschiede, sondern ich froi mich druf, im März mit mine Eltere na d Karibikküste z bereise. I dem Sinn: ¡Hasta luego Costa Rica y Pura Vida! 🇨🇷 🤗
