San Juan del Sur, Nicaragua

¡Bienvenidos a Nicaragua!

Vor öpe 10 Täg bin ich in San Juan del Sur (Nicaragua) acho. Wiemer mim letzte Blogitrag het chöne entneh, esch d Ireis echli müehsam xii, aber es het sich meh als glohnt :-)

Zerst bin ich namal e Woche id Schuel ond han det Privatunterricht gha. Es het mega guet tah, vor allem wel ich in Sámara hauptsächlich Grammatik ond Theorie glernt han ond s jetzt jede Namitag 4 Stund han chöne awende. Ich han inere Gastfamilie grad 3 Hüser neb de Schuel gwohnt mit no anere andere Schwiizerin. 

Eini vode Schuel (ganz links vorne ufem Bild) chunt sogar vo Bade, mega Zuefall :-) aber sosch esches da vode Nationalitäte her chli durchmischter xii, es het Lüt us de USA, Puerto Rico, Schwede, Dänemark, Kanada ond sogar eini us de Slowakei gha.

Einisch simer im Restaurant „Pelicans Eyes“ ufem Hügeli obe go Znacht esse. Es esch zwar echli türer als sosch (ca. $ 20,00 sosch chasch für 8-10$ Znacht esse da), aber d Ussicht esches uf jede Fall wert xii. Vo det us xehsch über ganz San Juan del Sur ond esch perfekt, zum de Sonneuntergang gnüsse.

Ansonste hani eifach oft Usflüg zu verschiednige Stränd gmacht, z.B. an Playa Hermosa, Remanso ond momentan liggi grad am Playa Madersa ond han mis Buech im Hostel HC Blau Mar (chani witerempfehle, falls mal öper uf SJDS wet gah ;-)) vergesse, drum nutzi die Ziit, zum oich echli unterhalte 🙃

Am Wochenend esch mich sehr spontan en Kolleg vode Edelweiss, de Ali, go bsueche. Er het us de Reserve uf San José müesse ond en Tag vorher entschiede, dass er mich da chunt go bsueche. Schön, hesch de wiiti Weg (je 7 Stund mitem Bus) uf dich gnoh 🤗

Vo dem Hügel, wo die gross Jesus-Statue staht (glich wie in Rio de Janeiro) het mer en super Usblick über die ganz Stadt. Es lohnt sich uf jede Fall, de Fuessmarsch à 30 Minute steil berguuf uf sich zneh. Für de Itritt zahlt mer 2$.

Ganz speziell esch d Stimmig au da währendem Sonneuntergang, aber ois het de Hunger vorher igholt ond drum simer früehner scho weder abe.

Morn gahts denn wiiter uf d Isla de Ometepe im Lago de Nicaragua (grössti Süesswasser-See in Zentralamerika) mit zwei Vulkän, womer chan bestiege. Han aber ghört, dass die Wanderige ziemlich astrengend sind (öpe 8 Stund für ufe ond weder abe), vo dem her mal luege, ob mer ois das wend atue bi dere Hitz ;-)

Ihr werdets uf jede Fall ih eim vo mine nächste Blog-Iträg erfahre 🤗